Rhodes' Cottage
Die Rhodes' Cottage huisves 'n museum gewy aan die lewe van Cecil John Rhodes. Dit is geleë by Hoofstraat 246 in Muizenberg.
In die museum word persoonlike aandenkings van Rhodes uitgestal wat sy rol in Afrika in 'n bepaalde lig stel. Daar is foto's, koerantuitknipsels, spotprente, 'n model van die Groot Gat in Kimberley en 'n diorama van die Matoppo Heuwels in Zimbabwe.
Hierdie beskeie huis is gebou in die 1880's en op 27 Februarie 1899 uit 'n boedel aan Rhodes verkoop. Dit het 'n tradisionele boustyl met 'n stoep. Oorspronklik het dit 'n sinkdak gehad. Die skuins erf word goed onderhou en gee uit die huis 'n uitstekende uitsig oor Valsbaai.
Toe Rhodes in Februarie 1902 uit Engeland terugkeer, was hy maar kort op sy landgoed Groote Schuur in Nuweland. Hy het erg aan sy hart en asma gely en die koeler seelug by Muizenberg sou vir hom beter wees as die Februarie-warmte van Nuweland. Om die vloei van die vars seelug deur die huisie te verbeter is 'n gat deur die muur by sy bed gekap. Nogtans was hy ongemaklik en besluit dus om na die koeler Engeland terug te keer. Voor hy kon vertrek, sterf hy op 26 Maart 1902.
In 1932 dra die Rhodes Trustees die huis oor aan die regering van Noord-Rhodesië (tans Zambië). Op hul beurt skenk hulle dit in 1937 aan die Stad Kaapstad en word dit beheer deur die Historiese Vereniging van Muizenberg. Die jaar daarop is die huis tot nasionale gedenkwaardigheid verklaar.
Bibliografie
[wysig | wysig bron]- Fransen, Hans: Guide to the museums of Southern Africa. Kaapstad: Suid-Afrikaanse Museumvereniging, 1978.
- Lantern, jaargang 29, nr. 3, September 1980. ISSN 0023-8422