Royal Mail

in Wikipedia, die vrye ensiklopedie
Royal Mail PLC

Tipe Britse publieke maatskappy met beperkte aanspreeklikheid (PLC)
Gestig 1516
Hoofkantoor 100 Victoria Embankment, EC4Y 0HQ, Londen, EngelandVlag van Verenigde Koninkryk Verenigde Koninkryk
SleutelpersoneKeith Williams (voorsitter)
Stuart Simpson (tussentydse hoof uitvoerende beampte)
Gebied bedienVerenigde Koninkryk en wêreldwyd
IndustriePos- en vragdienste
DiensteVervoer en aflewering van posstukke en pospakkette, vragdienste, derdeparty-logistiek
Inkomste £10,581 miljard (2019)[1]
Bedryfsinkomste £160 miljoen (2019)
Netto inkomste £175 miljoen (2019)
Werknemers162 000 (2019)
DivisiesRoyal Mail, Parcelforce Worldwide
Dogter-
maatskappye
General Logistics Systems (GLS)
Webwerfroyalmail.com
'n Ryk versierde posbus uit die Victoriaanse tydperk. Die twee letters op Britse posbusse dui aan in wie se regeringstyd dit geïnstalleer is: VR is die afkorting vir die Latynse Victoria Regina, koningin Victoria. Die posbus in die inligtingskassie dateer uit die regeringstyd van koning George V (1910–1936)

Royal Mail plc (Skots-Gaelies: a' Phuist Rìoghail, Wallies: Post Brenhinol), is 'n posonderneming in die Verenigde Koninkryk wat oorspronklik in 1516 deur koning Hendrik VIII gestig is toe hy aan Sir Brian Tuke die opdrag gegee het om 'n posnetwerk in diens van die koninklike Engelse hof te vestig. Onder koning Karel I het hierdie posnetwerk sy dienste vanaf 1635 ook aan die publiek beskikbaar gestel. In Oliver Cromwell se Gemenebes van Engeland het die posdiens as General Post Office bekendgestaan.[2]

Royal Mail se dogteronderneming Royal Mail Group Limited bedryf twee handelsmerke vir die vervoer en aflewering van briewe en ander posstukke (Royal Mail) en pospakkette (Parcelforce Worldwide). General Logistics Systems, 'n internasionale logistiekonderneming, is 'n dogtermaatskappy van Royal Mail Group Ltd.

Vir die grootste deel van sy geskiedenis was Royal Mail 'n staatsonderneming wat as 'n regeringsdepartement of 'n publieke maatskappy bedryf is. Eers met die afkondiging van die Wet oor Posdienste van 2011 (Postal Services Act 2011) is die meerderheid aandele in Royal Mail vanaf 15 Oktober 2013 op die Londense Effektebeurs verhandel. Twee maande later, op 23 Desember 2013, is die aandele in die FTSE 100-indeks gelys.

Aanvanklik het die Britse regering deur Postal Services Holding Company Ltd 'n minderheid aandele van dertig persent in Royal Mail gehou. Op 4 Junie 2015 het die minister van finansies, George Osborne, aangekondig dat die regering sy oorblywende aandele sal verkoop. Nog in dieselfde jaar is Royal Mail volledig geprivatiseer.

As houermaatskappy beheer Postal Services Holding Company Ltd ook Post Office Ltd wat op 1 April 2012 as 'n selfstandige onderneming van Royal Mail afgeskei is en steeds as staatsonderneming bestuur word.

Verwysings[wysig | wysig bron]

  1. Royal Mail plc - Annual Report and Financial Statements 2018-19. Besoek op 25 Junie 2020
  2. "The Postal Museum: Our History. Besoek op 23 Oktober 2017". Geargiveer vanaf die oorspronklike op 29 November 2017. Besoek op 23 Oktober 2017.