Saharawoestyn-brand

in Wikipedia, die vrye ensiklopedie
Jump to navigation Jump to search

Die Saharawoestyn-brand van November 1961 tot April 1962 in ‘n gasput het vlamme veroorsaak wat tot deur ruimtevaarders waargeneem is.

Op 6 November 1961 ontstaan daar ‘n brand in ‘n gasput by Gassi Touil in die gebied Grand Erg Oriental van Algerië weens ‘n breuk in ‘n aardgaspypleiding van die Phillips Petroleum Co.

Hierdie put het ‘n 170 m³ gas per sekonde gelewer en die gevolglike vlammesuil bereik ‘n hoogte van oor die 200 m. Dit raak bekend as die Devil’s Cigarette Lighter. Ruimtevaarder John Glenn het uit die Friendship 7-ruimtetuig gerapporteer dat hy die vlamme gewaar.

Red Adair, die Amerikaanse bestryder van olie- en gasbrande, en sy span geniet wêreldroem na die blus van die brand op 28 April 1962. In daardie 6 maande het 16 miljoen m³ gas verlore geraak. Sy metodes het Adair ook toegepas by die blus van die brandende oliebronne in Koeweit wat tydens die Golfoorlog (1990–91) deur die Irakese aan die brand gesteek is. Adair en sy spanne blus daar 117 oliebrande in 9 maande.

Hierdie waaghalsige prestasie in die Sahara is die onderwerp van die film Hellfighters van 1968 waarin John Wayne die rol speel van Adair.