Sanipas

in Wikipedia, die vrye ensiklopedie
Jump to navigation Jump to search
Sanipas
’n Beeld van die betrokke bergpas.
Sanipas

Ligging Tussen Suid-Afrika en Lesotho
Hoogte 3482 m
Lengte 9 km
Oppervlak Grondpad
In Drakensberge

Die Sanipas is 'n bergpas in die Drakensberge wat begin in Suid-Afrika en eindig in Lesotho. Dit is die enigste toegangspad met Lesotho se oostekant. Dit is die hoogste bergpas in Suidelike Afrika wat deur motorvoertuie gebruik kan word; al is dit slegs vierwiel-aangedrewe voertuie.

Geskiedenis[wysig | wysig bron]

Padbordjie
Suid-Afrikaanse grenspos by die Sanipas
Die Sanipas, met wolke oor die Suid-Afrikaanse kant van die grens

Hierdie pas gaan tussen Hodgson se Piek en die Twaalf Apostels oor die Drakensberg en is eerste deur die Boesmans gebaan. Later het veewagters die roete gevolg wat vee gebring het om mee handel te dryf. Daarna het pakdiere gevolg, hoofsaaklik Basoetoponies wat gebruik is om produkte en noodsaaklike voorraad na die Sothovolk te neem.

Die eerste groot verbetering op die voetpad was in 1912 toe 'n pad van 2 m breed gebou is. Dit het die roete aansienlik makliker gemaak vir pakdiere en dit het so gebly tot na die Tweede Wêreldoorlog. In 1949 het David Alexander 'n vervoerdiens met jeeps ingestel om vrag tussen Himeville en Mokhotlong te vervoer. Die pad is weer in 1958 verbeter.

Die Roete[wysig | wysig bron]

Die pas verbind Himeville en Mokhotlong oor 'n afstand van 93 km. Die afdraai na die pas is 3 km noord van Himeville. Van die voet van die pas (2 255 m), 23 km van Himeville af, klim die pad 600 m oor 14 km langs die boloop van die Mkomazanarivier tot by die grenspos, ook genoem Sanipas, op die grens van Lesotho (2 865 m). Die kruin van die Drakensberg word 3 km verder bereik. Van hier af styg die pad steeds oor die Saniplato tot by die kruin van Swartberg (3 200 m). Die piek is 10 km suid van Thabana Ntlenyana (3 482 m) wat die hoogste punt van die Drakensberg en in Suidelike Afrika is. Hiervandaan daal die pad met die loop van die Sehonghongrivier tot by Mokhotlong.[1][2]

Sien ook[wysig | wysig bron]

Verwysings[wysig | wysig bron]

Koördinate: 29°35′17.3″S 29°17′33.8″O / 29.588139°S 29.292722°O / -29.588139; 29.292722