Drakensberge

in Wikipedia, die vrye ensiklopedie
Jump to navigation Jump to search
Drakensberge
South Africa - Drakensberg (16261357780).jpg
Ligging Lesotho en Suid-Afrika
Hoogte 3 482 meter
Reeks Drakensberge
Koördinate 29°23′S 29°27′O / 29.383°S 29.450°O / -29.383; 29.450Koördinate: 29°23′S 29°27′O / 29.383°S 29.450°O / -29.383; 29.450
Die Drakensberge in die somer.
Sneeu op die Drakensberge.

Die Drakensberge, wat oor 'n afstand van byna 1 000 kilometer van die Kaapse Stormberge deur die Vrystaat en KwaZulu-Natal tot by die Wolkberg in Limpopo strek, is die grootste bergreeks in Suider-Afrika.

Die Drakensberge skei die hoogplato van die Suid-Afrikaanse binneland van die laerliggende kusgebiede in die ooste van die land en is die grootste waterskeiding. Die Oranje- en Tugelarivier, twee van Suid-Afrika se grootste riviere, het hulle oorsprong by die Mont-aux-Sources (Frans: "Berg by die bronne").

Sneeuval kom gereeld voor in die winter, terwyl mis en reën die hele jaar kan voorkom.

Die Koninklike Natalse Nasionale Park is een van die mees bekende in Suid-Afrika. Naas die oorsprong van die Tugelarivier en die tweede hoogste waterval ter wêreld, die Tugelawaterval (912 meter), spog die park met meer as 170 voëlspesies, waaronder die bedreigde lammervanger. Die sentrale gedeelte van die bergreeks beskik oor 'n groot aantal voetslaanpaaie, wat ook toegang bied tot die rotskuns van die Boesmans.

Die uKhahlamba of Nasionale Drakensbergpark in KwaZulu-Natal is deur Unesco in 2000 as wêrelderfenisgebied gelys.

'n Panoramiese uitsig oor Giant's Castle
'n Kaart van Suid-Afrika wat die sentrale plato gekant deur die Groot Platorand, en sy verhouding met die Kaapse-Vouberge na die suide toon. Die gedeelte van die Groot Platorand in rooi staan bekend as die Drakensberge.


Etimologie[wysig | wysig bron]

Die Afrikaanse naam Drakensberge kom van die naam wat die vroegste Nederlandse setlaars dit gegee het. Hulle het dit Die Drakensbergen genoem. Verskeie moontlike redes vir hierdie naam sluit in die puntige toppe wat soortgelyk is aan die agterkant van die mitiese Europese draak, ou plaaslike legende waarvolgens dit die tuiste van vuurspuwende drake sou wees, en moontlike bevindings van dinosourus fossiele (wat miskien verwar was met die oorblyfsels van drake).[1]

Gewoonlik wanneer Suid-Afrikaners en besoekers van die Drakensberge praat, verwys hulle na die Groot Platorand wat die grens vorm tussen Lesotho en KwaZulu-Natal, met die geloof dat dit 'n reeks berge is wat tot in Lesotho strek, maar wat eintlik korrek bekend staan as die Lesotho Hoogland. Hierdie hoogste gedeelte van die Groot Platorand staan bekend as uKhahlamba ("Versperring van regop spiese")[2] in Zoeloe en Maluti in Sotho.

Geologiese oorsprong[wysig | wysig bron]

Die Drakensberge het hulle ontstaan sowat 150 miljoen jaar gelede aan vulkaniese uitbarstings te danke en is 'n oorblyfsel van 'n groter plato.

Bergpasse[wysig | wysig bron]

Daar is talle bergpasse oor die Drakensberg waarvan die Sanipas, Van Reenenspas, en Bushman's Nek-Pas van die bekendste is.

Hoogste pieke[wysig | wysig bron]

Thabana Ntlenyana ("Klein Berg") in Lesotho (3 482 meter) is die Drankensberge se hoogste piek. Ander noemenswaardige pieke sluit in Mafadi in Suid-Afrika (3 451 meter), Ben Macdhui (in Oos-Kaap), Cathkinpiek, Cathedralpiek, Cleftpiek, Giant's Castle en Sentinel wat almal meer as 3 000 meter verrys.

Sien ook[wysig | wysig bron]

Verwysings[wysig | wysig bron]

  1. "Drakensbergen in Kwazulu-Natal". visitafricanow.com (in Nederlands). Besoek op 2018-04-26. 
  2. Pearse, Reg O. (1973). Barrier of Spears: Drama of the Drakensberg. H. Timmins. p. i. ISBN 978-0-86978-050-3. 

Eksterne skakels[wysig | wysig bron]