Seafarer

in Wikipedia, die vrye ensiklopedie
Jump to navigation Jump to search

Die passasier- en vragskip SS South African Seafarer van 8101 ton het in die vroeë oggendure van 1 Julie 1966 in Tafelbaai sonder enige lewensverlies vergaan.

Die SA Seafarer is in 1950 deur die Greenock Dockyard Co. gebou. Aanvanklik was die skip bekend onder die naam Clan Shaw, maar dit is later na Steenbok verander. In 1960 is die skip verkoop aan die Springbok Shipping Co. Ltd., in 1966 herdoop tot die SA Seafarer met Kaapstad as tuishawe en bestuur deur die Safmarine-redery.

In Junie 1966 vertrek die skip uit Glasgow na Beira in Mosambiek. Aan boord was 'n bemanning van 63, 12 passasiers en 'n vrag van 7 800 ton bestaande uit 'n besending gevaarlike chemiese middels, duisende bottels whiskey en 70 ton tydskrifte.

Toe die skip op 30 Junie Tafelbaai nader, het die noordweste wind teen 30 knope gewaai, die see was dus besonder rof en die lug was swaar bewolk. Om probleme met die gevaarlike vrag te voorkom, besluit die hawekaptein, kapt. Matson, dat die skip buite die hawe moes wag tot dagbreek. Weens misverstande en 'n reeks kleiner foute besluit die 32-jarige kapt. Ian Branch om nogtans te kom vasmeer.

Op 1 Julie net na middernag tref die skip rotse 'n paar honderd meter van die Groenpuntvuurtoring. Die romp van die skip het gou krake begin toon en begin opbreek. Geen reddingsbote kon die gevaarlike see aandurf nie en die weerstoestande het boonop versleg. Die krake het groter geword en die vrag het begin uitspoel. Drie helikopters het al die opvarendes te ontruim.

Vir die versekeraars was die verlies groot: R2½ miljoen vir die skip en R2 miljoen vir die vrag. Kapt. Branch is in die geregtelike ondersoek aan nalatigheid skuldig bevind.

Hierdie stranding het getoon dat die werklike belangrike reddingstuig by skipbreuke nie reddingsbote is nie, maar helikopters. Ook is bewys dat moderne navigasiemiddels nie skeepsrampe heeltemal gaan uitskakel nie, omdat die menslike faktor altyd 'n rol speel.

Bibliografie[wysig | wysig bron]

  • Burman, Jose: Great shipwrecks off the coast of southern Africa. Kaapstad: Struik, 1967.
  • Turner, Malcolm: Shipwrecks and salvage in South Africa – 1505 to the present. Kaapstad: Struik, 1988. ISBN 0-86977-387-9
  • www.historicalmedia.co.za
  • www.flickr.com
  • www.wrecksite.eu