Seestroom

in Wikipedia, die vrye ensiklopedie
Oseaniese oppervlakstrome.

'n Seestroom is 'n aanhoudende, gerigte beweging van seewater wat veroorsaak word deur 'n verskeidenheid faktore wat op die water inwerk, soos wind, die Corioliskrag, brekende golwe, kabbeling en verskille in temperature en soutgehalte.[1] Dieptekontoere, kuslynkonfigurasies en wisselwerkings met ander strome beïnvloed 'n stroom se rigting en sterkte.

Seestrome is hoofsaaklik horisontale waterbewegings.

Omskrywing[wysig | wysig bron]

Seestrome vloei vir groot afstande en saam vorm hulle die globale vervoerband van seewater, wat 'n belangrike rol speel in die bepaling van die klimaat van baie van die Aarde se streke. Hulle beïnvloed veral die temperatuur van die streke waardeur hulle vloei. Warm strome wat aan kuslyne met 'n gematigde temperatuur vloei, verhoog die temperatuur van die gebied deurdat dit die seebries verhit wat oor die gebied waai.

Die beste voorbeeld is dalk die Golfstroom, wat Noordwes-Europa se klimaat baie gematiger maak as dié van lande soos Kanada wat op dieselfde breedtegraad lê. Nog 'n voorbeeld is Lima, Peru, waarvan die koeler subtropiese klimaat kontrasteer met dié van die omringende tropiese klimate vanweë die koue Humboldtstroom.

Seestrome is dus patrone van watervloei wat klimaatstreke en weerpatrone oor die hele wêreld beïnvloed. Benewens wind en digtheid, speel ander faktore ook 'n rol, insluitende die vorm en konfigurasie van die seebekken waardeur hulle vloei. Die twee basiese soorte strome – oppervlak- en diepseestrome – help bepaal die aard en vloei van seestrome oor die planeet.

Termohaliene sirkulasie[wysig | wysig bron]

Termohaliene sirkulasie is die vervoerband van die Aarde se seewater.[2] "Termo-" dui op temperatuur en "-halien" op soutgehalte. Albei faktore het 'n invloed op die digtheid van water en dus op die feit of water styg of daal.

Sout water is 2 tot 3 present swaarder as soet water, en koue water is swaarder as warmer water. Die sout water sal na die bodem sink en na die kant wegstroom. Hierdeur ontstaan 'n konveksiestroming, in dié geval 'n termohaliene stroming genoem. Die Golfstroom is so 'n voorbeeld.

Termohaliene sirkulasie is 'n wêreldwye verskynsel en belangrik vir die hele klimaatstelsel van die Aarde.

Verwysings[wysig | wysig bron]

  1. NOAA, NOAA. "What is a current?". Ocean Service Noaa. National Ocean Service. Besoek op 13 Desember 2020.
  2. S. Drijfhout. De transportband van de oceaan, KNMI

Skakels[wysig | wysig bron]