Selfportret (Opgedra aan Paul Gauguin)

Selfportret (Opgedra aan Paul Gauguin)

Vincent van Gogh, 1888

Olie op doek, 62 × 52 cm

Fogg Art Museum

Selfportret (Opgedra aan Paul Gauguin) is 'n selfportret wat die Nederlandse skilder Vincent van Gogh in 1888 in Arles, Frankryk, geskilder het.

Van Gogh het in 1886 na Parys verhuis waar hy Henri de Toulouse-Lautrec ontmoet en vriendskappe met Émile Bernard en Paul Gaugin gesmee het. Van Gogh en Gauguin se ontmoeting was die begin van een van die "mees besproke kunsvriendskappe in die kunsgeskiedenis. Dit is 'n verbintenis waarin hoop en teleurstelling, kameraadskap en wedywering, bewondering en jaloesie mekaar voortdurend afgewissel het."

Van Gogh beraam ook 'n plan waarvolgens hy en Gauguin in die Geel Huis in Arles sou saamwoon as 'n oplossing vir die finansiële probleme wat hulle voortdurend ondervind. Theo van Gogh, Vincent se broer, oortuig Gauguin uiteindelik om by Van Gogh in Arles aan te sluit. Daar bring hulle van 21 Oktober tot 24 Desember 1888 'n kort maar hoogs produktiewe samewerkingsperiode deur. Die besoek eindig op 'n treurige noot met die insident waarin Van Gogh deel van sy oor afsny en in 'n psigiatriese inrigting beland en Gauguin na Parys vlug.

Selfportret is in die aanloop tot Gauguin se besoek aan Arles geskilder en is aan hom opgedra en aan Gaugin gestuur in 'n ruilooreenkoms.