Sint Michail-kasteel

in Wikipedia, die vrye ensiklopedie
Die suidelike aansig van Sint Michail-kasteel.
Die westelike aansig.
Die noordelike aansig.

Die Sint Michail-kasteel (Russies: Михайловский замок; Michailofski zamok), ook bekend as die Ingenieurskasteel (Инженерный замок; Inzjenerni zamok), is ’n voormalige keiserlike woning in die historiese deel van Sint Petersburg, Rusland. Dit is van 1797 tot 1801 gebou as ’n woning vir keiser Paul deur die argitekte Vincenzo Brenna en Wasili Bazjenof. Die kasteel lyk van elke kant af anders omdat verskeie boustyle gebruik is.

Die Sint Michail-kasteel het ’n klein somerpaleis van keiserin Elisabeth vervang, net suid van die Somertuin. Paul, wat altyd bang was vir sluipmoordaanvalle, het nie van die Winterpaleis gehou nie en het nooit daar veilig gevoel nie. Vanweë sy belangstelling in Middeleeuse ridders en sy vrees vir sluipmoordaanvalle het hy dit soos ’n kasteel laat bou. Dit word omring deur water van die Moika- en Fontanka-rivier en twee kanale wat spesiaal laat grawe is sodat die kasteel op ’n kunsmatige eiland lê wat net deur ’n ophaalbrug bereik kan word.

Ironies is Paul in ’n sluipmoordaanval dood net 40 nagte nadat hy in die nuwe kasteel ingetrek het. Hy is op 12 Maart 1801 in sy eie slaapkamer vermoor deur ’n groep offisiere wat hy ontslaan het. Die samesweerders het hom probeer dwing om ’n abdikasie-dokument te teken. Hy het weerstand gebied, waarna hy met ’n swaard gekap, gewurg en toe doodgetrap is.

Ná sy dood het die keiserlike familie na die Winterpaleis teruggetrek. Sint Michail is in 1823 aan die leër se ingenieurskool geskenk. Dit staan sedertdien bekend as die Ingenieurskasteel. In die vroeë 1990's het Sint Michail ’n tak van die Russiese Museum geword en dit huisves nou sy portretgallery.

Verwysings[wysig | wysig bron]

Hierdie artikel is merendeels vertaal vanaf die Engelse Wikipedia-artikel en:Saint Michael's Castle
  • Pamjatniki architektoeri Leningrada (Argitektuur-monumente van Leningrad). Red. A.N. Petrof. 4de uitgawe. Leningrad: Strojizdat, 1976.
  • Nordisk Familjebok. 2de uitgawe. Stockholm, 1904.

Eksterne skakels[wysig | wysig bron]

Koördinate: 59°56′26″N 30°20′16″O / 59.94056°N 30.33778°O / 59.94056; 30.33778