Liaoning (vliegdekskip)

Liaoning (vliegdekskip)

Naam	Liaoning
Klas en tipe	Tipe 001 vliegdekskip
Bouers	Nikolajef-Suid (Swartseewerf)
Gebruik deur	Rooi Chinese Vloot
Boudatum	1985–1988
Datum neergelê	6 Desember 1985
Te water lating	4 Desember 1988
Aantal voltooi	1
In diens gestel	25 September 2012
In gebruik	1
Lot	Aktiewe diens
Tuishawe	Dalian
Verplasing	67 500 ton (volvrag)
Lengte	304,5 m (vliegdek) 270 m (waterlyn)
Wydte	75 m (vliegdek) 35 m (waterlyn)
Diepgang	8,97 m
Spoed	32 kn (59 km/h)
Bemanning	1 960 (skip) 626 (lugvleuel)

Die Liaoning (Chinees: 中国人民解放军海军辽宁舰), is 'n vliegdekskip van die Chinese Vloot. Die skip is na die provinsie Liaoning vernoem, waar sy bouwerk voltooi is. Dit dra die Chinese aanduiding Tipe 001. Die skip is in 2012 in diens gestel, maar toe nog sonder vliegtuie. In 2013 word die gewenste vliegtuigtipe, die Shenyang J-15, asook 'n aantal helikopters, op die vliegdekskip ontplooi.

Sowjetherkoms

Die skip is oorspronklik vir die Sowjetvloot gebou as die Riga en die romp is op 4 Desember 1988 te water gelaat. In 1990 word die skip herdoop as die Varyag. In 1991 besluit die Russiese ministerie van Verdediging om konstruksie aan die skip dadelik te staak. Die skip was op daardie stadium 68% voltooi; onder andere het die elektronika en die aandrywing nog ontbreek. Na die ontbinding van die Sowjetunie en die daaropvolgende boedelskeiding word die skip se voltooiing toegewys aan die nuutgestigde Oekraïense Vloot.

Verkoop en op sleeptou na China

Die Oekraïne probeer onsuksesvol om die skip in die jare negentig te verkoop; ten slotte word die romp in 1998 vir 20 miljoen dollar aan 'n Chinese maatskappy verkoop wat beweer dat hulle dit in 'n drywende hotel en kasino in Macau wil omskep. 'n Militêre bestemming word verbied. Die skip moes uit die Swartsee na China gesleep word, waarby 'n moeisame deurvaart van die Bosporus by Istanboel noodsaaklik was.

Turkye wou aanvanklik nie hul toestemming gee vir 'n deurvaart deur die Bosporus nie, maar nadat 'n bedrag van 1 miljoen dollar oorhandig is, is die nodige toestemming in 2001 verkry. Omdat die owerhede wat die Suezkanaal beheer ook nie toestemming vir die deurvaart van gesleepte skepe gee nie, word die skip om Afrika gesleep. In 2002 arriveer dit in Macau. Die eienaar het egter geen kasinovergunning gehad nie en die skip mag nie in Macau bly lê nie. Die skip word opsluit weggesleep en vasgemeer in 'n droogdok in Dalian. Die sleepkoste het na raming 7 miljoen dollar beloop.

Ondertussen het dit duidelik geword dat dit hier nie soseer om 'n drywende kasino gaan nie, maar wel om die wens van die Chinese Vloot van die Volksbevrydingsleër om oor werkende vliegdekskepe te beskik. Die skip is bedoel vir Chinese om ervaring op te doen met die werking van vliegdekskepe, nadat die eerste pogings tot 'n tru-ontwerp misluk het. In 2005 geword die Liaoning weer te water gelaat, en in 2011 onderneem die skip sy eerste toetsvaart. Op 25 September 2012 word die Liaoning amptelik in diens gestel.

Teen 2018 is die skip terug na die werf vir 'n gedeeltelike modernisering. Die brug en lugverkeersleiding word opgeknap en sal meer lyk na dié van die eerste Chineesgeboude vliegdekskip, Tipe 001A. In sy geheel word die brugtoring kleiner gemaak, waardeur daar meer ruimte vir vliegtuie op die dek sal wees.

Kommissie en aktiewe diens

Die skip het op 25 September 2012 kommissie ontvang en is tans in aktiewe diens van die Chinese Vloot.

Verwysings

Hierdie artikel is in sy geheel of gedeeltelik vanuit die Nederlandse Wikipedia vertaal.