Telegonos

in Wikipedia, die vrye ensiklopedie
Jump to navigation Jump to search

Telegonos (Grieks: Τηλέγονος, "ver weg gebore") was in die Griekse mitologie die seun van Kirke en Odusseus.[1][2]

Mitologie[wysig | wysig bron]

Toe Telegonos groot was, het Kirke hom gestuur om Odusseus, wat teen dié tyd eindelik van die Trojaanse Oorlog na Itaka teruggekeer het, te vind. Telegonos is deur ’n storm weggedryf en toe hy op Itaka aanland, het hy gedink dit is Korkura (Corfu). Hy het die eiland begin plunder omdat hy honger was. Odusseus en sy oudste seun, Telemachos, het hulle stad verdedig en Telegonos het sy pa per ongeluk doodgemaak met ’n spies wat in die gif van ’n pylstertvis gedoop is.[3]

In opdrag van die godin Atena het Telegonos sy pa se lyk teruggeneem na Aiaia en dit daar begrawe. Hy het ook Odusseus se vrou, Penelope, en sy seun Telemachos saamgeneem. Kirke het hulle onsterflik gemaak en met Telemachos getrou, terwyl Telegonos Penelope as vrou geneem het.[4] By Penelope het hy die seun Italos gehad, wat Italië gestig en dit na homself genoem het.[2]

Dit is hoe die verhaal vertel word in die Telegonie, ’n vroeë Griekse epiese gedig waarvan net ’n opsomming bewaar gebly het, maar moontlik deur Eugamon van Sirene geskryf is en volg op die gebeure in die Odussee. Ander weergawes bestaan in die werk van latere digters. In ’n tragedie deur Sophokles, Odysseus Acanthoplex (wat ook nie bewaar gebly het nie), vind Odusseus by ’n orakel uit sy seun sal hom eendag doodmaak. Hy neem aan Telemachos word bedoel en hy verban hom van die eiland af. Toe Telegonos op Itaka aanland, wil hy Odusseus spreek, maar die wagte wil hom nie toelaat nie. ’n Skermutseling ontstaan en Odusseus, wat dink dit is Telemachos, storm uit en val aan. In die daaropvolgende geveg maak Telegonos hom dood.

Verwysings en notas[wysig | wysig bron]

  1. Pseudo-Apollodoros, Biblioteka Opsomming van Boek 4.7.16
  2. 2,0 2,1 Hyginus, Fabulae 127
  3. Pseudo-Apollodoros, Biblioteka Opsomming van Boek 4.7.36
  4. Pseudo-Apollodorus, Biblioteka Opsomming van Boek 4.7.37

Bronne[wysig | wysig bron]

Skakels[wysig | wysig bron]