Telly Savalas
| Telly Savalas | |
| |
Savalas in 1973.
| |
| Geboortenaam | Aristotelis Savalas |
|---|---|
| Geboorte | 21 Januarie 1922 |
| Sterfte | 22 Januarie 1994 (op 72) |
| Nasionaliteit | Amerikaans |
| Beroep(e) | Akteur |
| Aktiewe jare | 1950–1994 |
| Internet-rolprentdatabasis-profiel | |
Aristotelis "Telly" Savalas (Grieks: Αριστοτέλης "Τέλλυ" Σαβάλας; 21 Januarie 1922 – 22 Januarie 1994) was ’n Amerikaanse akteur wie se loopbaan oor vier dekades van televisie gestrek het. Hy was bekend vir sy diep rasperstem en kaal kop. Hy het ook een liedjie, "If?", in 1975 in Brittanje uitgereik.[1]
Loopbaan
[wysig | wysig bron]
Savalas was die seun van Grieks-Amerikaanse ouers en het eers op skool begin Engels leer. Sy loopbaan het as regisseur van spesiale nuusgebeure by die TV-netwerk ABC begin. Sy eerste rol was in 1958 in ’n episode van die TV-dramareeks Armstrong Circle Theatre. Hy was in 1959 en 1960 in nog twee episodes te sien.
Tussen 1959 en 1967 het hy meer as 50 gasverskynings in reekse soos Naked City, Empire, The Eleventh Hour, The Untouchables en The Man from U.N.C.L.E. gehad. In 1980 was hy in die TV-fliek Alcatraz: The Whole Shocking Story.
Terwyl hy in die reeks The Witness was, het die akteur Burt Lancaster hom "ontdek". Savalas het saam met Lancaster in vier rolprente gespeel, waarvan die eerste die misdaaddrama The Young Savages (1961) was. Hy is vir ’n Oscar vir beste manlike byspeler benoem vir ’n ander een, Birdman of Alcatraz (1962). In dieselfde jaar was hy saam met Gregory Peck en Robert Mitchum in Cape Fear (1962). Hy het sy hare afgeskeer vir sy rol as Pontius Pilatus in The Greatest Story Ever Told (1965) en het besluit om nie weer sy hare te laat groei nie.
Daarna was hy te sien in The Dirty Dozen (1967) en twee van sy opvolgprente, weer saam met Lancaster in The Scalphunters (1968), in Crooks and Coronets (1969) en saam met Clint Eastwood in Kelly's Heroes (1970).
Kojak
[wysig | wysig bron]Savalas se bekendste rol was in die TV-reeks Kojak. Die reeks se oorsprong was die TV-fliek The Marcus-Nelson Murders (CBS, 1973), wat gebaseer was op die werklike "Career Girls"-moordsaak.[2] Die naam van Savalas se karakter met sy eerste verskyning was Theo "Kojack". Hy is twee jaar agtereenvolgens vir ’n Emmy benoem vir sy spel as Kojak en het dit in 1974 gewen. Hy is ook van 1975 tot 1978 vir Golden Globes benoem en het dit twee keer gewen, in 1975 en 1976.
CBS het die reeks in 1978 ná vyf seisoene en 118 episodes gekanselleer weens lae kykertalle. Savalas het Kojak daarna in nog ’n paar TV-flieks vertolk.
Verwysings
[wysig | wysig bron]- ↑ "What The What Telly Savalas Had a 1 Hi Song on this Date in 1975" (in Engels). K1017FM.com. 9 Maart 2015. Geargiveer vanaf die oorspronklike op 31 Maart 2016. Besoek op 5 Februarie 2016.
- ↑ "Thomas J. Cavanagh Jr., 82, Who Inspired 'Kojak,' Dies", The New York Times, 4 Augustus 1996.
Eksterne skakels
[wysig | wysig bron]- TellySavalas.com
- Telly Savalas in die Internet-rolprentdatabasis
Wikimedia Commons het meer media in die kategorie Telly Savalas.
Hierdie artikel is vertaal uit die Engelse Wikipedia
Normdata  |
|
|---|