Titanic II

Titanic II is 'n beplande passasierskip wat as namaaksel van die befaamde Olympic-klas-stoomskip RMS Titanic ontwerp is. Die projek is in April 2012 deur die Australiese miljardêr-sakeman Clive Palmer aangekondig. Titanic II sal die nuwe vlagskip van sy Blue Star Line-redery wees en na verwagting in 2027 van stapel loop, 115 jaar nadat die oorspronklike RMS Titanic op sy nooiensvaart gesink het. Titanic II se eerste vaart sal van Southampton, Engeland na New York wees en dus dieselfde roete volg as sy historiese voorloper.

Clive Palmer sal die projek self befonds. Die hoofontwerper van die skip, wat van die nuutste beskikbare navigasietegnologie voorsien sal word, is Markku Kanerva. Titanic II sal deur die Finse maatskappy Deltamarin ontwerp en deur CSC Jinling, 'n Chinese skeepsbouwerf met sy hoofkwartier in Nanjing, gebou word. Die koste van die projek word op VSA-$200 miljoen beraam.

Die oorspronklike Titanic in 1912.

Bruce Ismay, 'n nakomeling van die direkteur van die White Star Line-redery wat die oorspronklike Titanic laat bou het, het net soos 'n kleindogter van die Titanic-oorlewende Molly Brown aktief by die projek betrokke geraak. Palmer se planne het nogtans kritiek van ander nakomelinge van Titanic-slagoffers uitgelok, waaronder Pat Lacey, 'n agterniggie van RMS Titanic se kaptein Edward J. Smith, terwyl die tegniese vermoëns van CSC Jinling om so 'n gesofistikeerde luukse passasierskip te bou, deur sommige waarnemers in twyfel getrek is aangesien hulle tot dusver slegs vragskepe vervaardig het.

Teen die einde van 2018 het Blue Star Line, eienaar van die voorgestelde Titanic II, geen verdere aankondigings oor die vaartuig gemaak nie. Die maatskappy het vir meer as vyf jaar stilgebly oor die projek en het tot 13 Maart 2024 geen verdere opdaterings met betrekking tot die seeskip vrygestel nie, toe aangekondig is dat Titanic II sy nooiensvaart in Junie 2027 sou onderneem.