Tom Egeland
Tom Egeland | |
|---|---|
| Gebore | 8 Julie 1959 |
| Nasionaliteit |  Noorweë |
| Beroep | Skrywer en joernalis |
| Webwerf | www.tomegeland.com |
Tom Egeland (* 8 Julie 1959 in Oslo) is 'n Noorse skrywer en joernalis. Sy boeke - hoofsaaklik rillers - is reeds in twintig tale vertaal.
Lewe
[wysig | wysig bron]Tom Egeland is in Oslo gebore en in die Kalbakken-buurt van die stadsdeel Grorud grootgemaak waar sy ouers 'n besigheid bedryf het. Hy het by Oslo se katedraalskool skoolgegaan en in 1977-1978 aan 'n uitruilprogram tussen Noorweë en die Verenigde State deelgeneem. Sy oorgrootvader Jon Flatabø, 'n volksdigter en boorling van Kvam in Hardanger, word as een van die baanbrekers van die populêre literatuur in Noorweë beskou.
Egeland was aanvanklik as joernalis by Noorweë se grootste weeklikse tydskrif vir mans, Vi Menn, die dagblad Aftenposten en die Oslo-nuusredaksie van die televisiekanaal TV 2 werksaam. Sedert 2006 is hy voltydse skrywer.
Literêre loopbaan
[wysig | wysig bron]Tom Egeland het sy debuut as skrywer in 1988 met die riller Stien mot fortiden ("Pad na die verlede") gemaak. In dié roman vertel hy die storie van 'n paar wat skielik in die Noorse Wiking-tydperk vasgevange sit ('n heruitgawe van die boek het in 2006 onder die titel Ragnarok verskyn).
Maar eers met Sirkelens ende het die eerste groot deurbraak vir Tom Egeland gekom. Die roman handel oor 'n goue skryn wat 'n 2000 jaar oud manuskrip bevat - 'n dokument wat die tradisionele sienswyse van Jesus van Nasaret en die Christendom dramaties verander. Die hoofkarakter, Bjørn Beltø, is 'n albino-argeoloog.
Enkele jaar nadat Sirkelens ende in 2001 gepubliseer is, het resensente en lesers opgemerk dat die roman se storielyn groot ooreenkomste met Dan Brown se internasionale blitsverkoper The Da Vinci Code toon wat twee jaar later in 2003 verskyn het. In onderhoude met internasionale en Noorse media het Egeland aantygings dat Brown sy boek moontlik geplagieer het, kategories verwerp.
Met Paktens voktere het Egeland in 2007 die opvolger van Sirkelens ende opgelewer waarin die argeoloog Bjørn Beltø weer as hoofkarakter verskyn. Ook hierdie boek is in die styl van 'n misterieuse riller geskryf en handel oor historiese geheime rondom Egiptiese farao's, die teologie van die Ou Testament, Moses se boeke en die Oud-Nordiese Wiking-tydperk.
Die roman Ulvenatten (2005) is later as rolprent en televisiereeks deur die Sweedse regisseur Kjell Sundvall en die rolprentmaatskappy Nordisk Film verfilm. Die rolprent het sy première op 29 Februarie 2008. Die TV-reeks word deur die Noorse kanaal TV 2 gebeeldsaai.
In Mei 2009 het Egeland sy nuwe riller, Lucifers evangelium, as opvolger van Sirkelens ende en Paktens voktere bekend gestel. Die boek is deur kritici in Oslo se dagblaaie goed ontvang en later met die Noorse Riverton-prys bekroon. In 'n onderhoud met die dagblad Aftenposten het Tom Egeland onthul dat die hoofkarakter in Sirkelens ende en Paktens voktere na twee van Jon Flatebø se pseudonieme vernoem is: Bjørn Botnen en Sven Beltø.
Lucifers evangelium is in Maart 2010 eweneens met die Riverton-prys bekroon. Vir die radiodramaterisering van sy speurverhaal Trollspeilet (1997), wat deur die Noorse uitsaaikorporasie NRK geproduseer is, het Egeland in 2009 met die Prix Europa bekroon.
Bibliografie
[wysig | wysig bron]- Stien mot fortiden (nuwe titel in 2006: Ragnarok) – parapsigologiese riller (1988)
- Skyggelandet – parapsigologiese riller (1993)
- Trollspeilet – speurverhaal (1997)
- Sirkelens ende – riller (2001)
- Åndebrettet – speurverhaal (2004)
- Ulvenatten – riller (2005)
- Paktens voktere – riller (2007)
- Piken i speilet – kinderboek (2007)
- Lucifers evangelium – riller (2009)
- Fedrenes løgner – roman (2010)
Verwysings
[wysig | wysig bron]- Hierdie artikel, of gedeeltes daarvan, is uit die volgende Wikipedia-artikel vertaal: Tom Egeland
Eksterne skakels
[wysig | wysig bron]- Tom Egeland se webtuiste
- Rivertonprisen 2009 Geargiveer 5 November 2010 op Wayback Machine
- NRK se dramatisering van Trollspeilet met "Prix Europa" bekroon[dooie skakel]
- Egeland se webtuiste op Forfatterbloggen Geargiveer 10 September 2010 op Wayback Machine
- Webtuiste op Aschehoug Geargiveer 23 Maart 2010 op Wayback Machine
- Digitale boeke van Tom Egeland[dooie skakel] in die Noorse Nasjonalbiblioteket
Normdata  |
|
|---|