Vergensie

in Wikipedia, die vrye ensiklopedie
Die twee oë konvergeer sodat hulle na dieselfde voorwerp kan kyk.

Vergensie is die gelyktydige beweging van albei oë in teenoorgestelde rigtings vir binokulêre visie.[1]

Wanneer ’n dier soos die mens met binokulêre visie na ’n voorwerp kyk, moet die oë om ’n horisontale as roteer sodat die beeld in die middel van albei retinas geprojekteer word. Om van naderby na ’n voorwerp te kyk, roteer die oë na mekaar (konvergensie), en as die voorwerp verder weg is, roteer hulle weg van mekaar (divergensie). As oordrewe konvergensie plaasvind, kyk ’n mens skeel (soos wanneer jy op jou neus fokus). Wanneer iemand in die verte kyk, divergeer die oë totdat hulle parallel is en dus op ’n punt in die oneindigheid gerig is.

Vergensiebewegings hou verband met akkommodasie van die oog. Wanneer die fokus van die oë verander om na ’n voorwerp op ’n ander afstand te kyk, sal vergensie en akkommodasie onder normale omstandighede outomaties plaasvind. Dit word soms "akkommodasie-konvergenierefleks" genoem.

In vergelyking met die fokus van oë wat ’n voorwerp volg wat beweeg (met ’n spoed van gemiddeld 500°/s), vind vergensie veel stadiger plaas (sowat 25°/s).

Verwysings[wysig | wysig bron]

  1. Cassin, B (1990). Dictionary of Eye Terminology. Solomon S. Gainesville, Fl: Triad Publishing Company. ISBN 978-0-937404-68-3.

Eksterne skakels[wysig | wysig bron]