Voorspel

in Wikipedia, die vrye ensiklopedie
’n Toneel uit die Italiaanse rolprent Appassionata (1974) van Gianluigi Calderone.

Voorspel is ’n stel emosioneel en fisiek intieme dade tussen twee of meer mense met die doel om seksuele prikkeling en begeerte vir seks te skep.[1] Hoewel voorspel gewoonlik beskou word as ’n fisieke, seksuele aktiwiteit, kan niefisieke aktiwiteite soos geestes- of verbale speletjies in sommige gevalle ook voorspel uitmaak. Voorspel beteken verskillende dinge vir verskillende mense.[1]

Definisies[wysig | wysig bron]

Voorspel is ’n dubbelsinnige term, want dit verskil van mens tot mens. Dit kan uit verskeie aktiwiteite bestaan, soos soen, seksuele aanraking, die uittrek van klere, orale seks, vingerseks, seksspeletjies of rolvertolkings.[1]

Voorspel kan sielkundig en fisiek belangrik wees. ’n Sekere vlak van vertroue is dikwels nodig om intimiteit te skep. Daar word geglo veral vroue het voorspel nodig om ’n orgasme te bereik.

Navorsing[wysig | wysig bron]

Volgens ’n opname onder heteroseksuele paartjies oor die duur van voorspel en seks, was nie een van die seksmaats tevrede met die duur van voorspel in hulle verhouding nie. Die 152 paartjies wat ondervra is, was meestal gegradueerdes wat tevrede met hulle sekslewe was. Die gemiddelde tyd wat aan voorspel afgestaan is, was 12 minute en aan seks 7 minute. Mans en vroue het dieselfde tyd vir voorspel begeer.[2]

In ’n studie onder sowat 12 000 mense uit 27 lande het 63 persent van die mans en 60 persent van die vroue gesê fisieke voorspel is baie belangrik.[3]

Volgens ’n studie onder mense wat in romantiese verhoudings betrokke was, is bevind pornografie en seksuele media speel nie ’n rol in die paartjies se tevredenheid met die lengte van voorspel nie. Individue het nog dieselfde hoeveelheid voorspel benodig om seksueel gestimuleer te raak ondanks wat hulle uit pornografie geleer het.[4]

Verwysings[wysig | wysig bron]

  1. 1,0 1,1 1,2 Lehmiller, Justin J. The psychology of human sexuality (2de uitg.). Hoboken, NJ. ISBN 9781119164708. OCLC 992580729.
  2. Miller, S. Andrea; Byers, E. Sandra (Augustus 2004). "Actual and desired duration of foreplay and intercourse: Discordance and misperceptions within heterosexual couples". The Journal of Sex Research. 41 (3): 301–309. doi:10.1080/00224490409552237. ISSN 0022-4499.
  3. Mulhall, John; King, Rosie; Glina, Sidney; Hvidsten, Kyle (April 2008). "Importance of and Satisfaction with Sex Among Men and Women Worldwide: Results of the Global Better Sex Survey". The Journal of Sexual Medicine. 5 (4): 788–795. doi:10.1111/j.1743-6109.2007.00765.x. ISSN 1743-6095.
  4. Leonhardt, Nathan D.; Willoughby, Brian J. (Februarie 2019). "Pornography, provocative sexual media, and their differing associations with multiple aspects of sexual satisfaction". Journal of Social and Personal Relationships. 36 (2): 618–641. doi:10.1177/0265407517739162. ISSN 0265-4075.

Eksterne skakels[wysig | wysig bron]