Vredenhof

in Wikipedia, die vrye ensiklopedie
Jump to navigation Jump to search
Die herehuis Vredenhof waarin die Hoërskool Groote Schuur aanvanklik gehuisves is. Dit is van 1971 af die tuiste van die Frank Joubert-kunssentrum, genoem na die Kaaplandse administrateur kapt. Frank Joubert (1889–1942).
Vredenhof.

Vredenhof is ’n meer as 100 jaar oue herehuis in die Kaapse suidelike voorstad Nuweland wat sedert 1971 die Frank Joubert-kunssentrum huisves. Dit is op 2 November 1990 tot ’n provinsiale erfenisterrein verklaar.[1]

Die herehuis se geskiedenis[wysig | wysig bron]

Die argitek John Parker het die huis in die Eduardiaanse boustyl in 1907 vir Christiaan Ludolph Marais ontwerp. Die gebou het tot 1953 in besit van die Marais-familie gebly. Nadat die nabygeleë Laerskool Groote Schuur in 1949 uit die statige maar vervalle ou herehuis Forest Lodge na sy nuwe gebou in Campgroundweg verhuis het, het die skoolkomitee hulle opnuut begin beywer vir die stigting van ’n hoërskool wat die leerlinge van die laerskool kon bywoon. Omstreeks 1953 of '54 het die laerskool se skoolkomitee besluit om die skoolraad te versoek om dadelik grond aan te koop waarop later 'n hoërskool gestig kan word omdat oop stukke grond toe reeds skaars begin raak het. 'n Stuk grond in Keurboomweg (die eiendom van die stadsraad) en nog 'n perseel in Palmyraweg is aanbeveel.

Die hoof van die laerskool, D. Lamprecht, het werk daarvan gemaak om die voorvermelde stukke grond vir die Hoërskool Groote Schuur te laat onteien. Die stuk grond aan Keurboomweg het die sierlike herehuis Vredenhof bevat wat die Hoërskool Groote Schuur vanaf sy stigting op 28 Januarie 1959 gehuisves het tot die inwyding van sy nuwe gebou op 17 Junie 1964, op die ses persele aan Palmyraweg wat ook onteien en gekonsolideer is. Hierna het die gebou Groote Schuur se skoolkoshuis gehuisves, maar van omstreeks 1969 af het dit leeg gestaan en is dit gevandaliseer.

Ontstaan van die Frank Joubert-kunssentrum[wysig | wysig bron]

Intussen het kapt. Frank Joubert, ’n oudstryder van die Eerste Wêreldoorlog en administrateur van Kaapland, 'n kunssentrum in Kaapstad gestig. In 1943, 'n jaar ná sy dood, het dit die Frank Joubert-kunssentrum geword. Hy het begrip gehad vir die helende krag van kuns en geld belê in die sentrum sodat oudstryders en kinders daar skeppend kon wees. Die sentrum is aanvanklik gehuisves in Rustenburg House.

Kuns as matriekvak is vanaf die 1960's by Frank Joubert aangebied onder die beskerming van die Kaaplandse onderwysdepartement (KOD). Die sentrum was, vandat die KOD dit oorgeneem het, toeganklik vir leerders van alles staatskole in die omgewing, veral van dié skole wat nie self kunsvakke kon aanbied nie. In 1971, nadat die KOD die geboue deeglik gerestoureer het, het die Frank Joubert-kunssentrum hierheen verhuis. Al het Groote Schuur se leerders, toe dié skool nog eentalig Afrikaans was, ’n groot deel van die sentrum se leerderkorps uitgemaak aangesien die skool en die sentrum skaars ’n straatblok van mekaar af geleë was en Groote Schuur nooit self kunsvakke aangebied het nie, was die sentrum se onderrigmedium destyds ook Engels.

Die naasliggende Vredenhof-sportveld en tennisbane het deel van die skool se terrein gebly. Leerders kon dekades lank vrye toegang tot die kunssentrum van die sportperseel af kry, maar meer onlangs is die Frank Joubert-sentrum met palissade afgesper.

Bronne[wysig | wysig bron]

Verwysings[wysig | wysig bron]

Eksterne skakels[wysig | wysig bron]

Koördinate: 33°58′27.36″S 18°28′23.97″O / 33.9742667°S 18.4733250°O / -33.9742667; 18.4733250