Weser
| Weser | |
|---|---|
 Die Weser se rivierloop en sy takriviere | |
| Oorsprong | Samevloeiing van Werra en Fulda, in Hannoversch Münden, Duitsland |
| Monding | Noordsee naby Bremerhaven |
| Stroomgebied | Deelstate Hesse, Nedersakse, Noordryn-Wesfale, Bremen |
| Lengte | 452 km (752 km insluitende die Werrarivier) |
| Oorspronghoogte | 116,5 m |
| Mondinghoogte | 0 m |
| Gemiddelde afloop | 119-324 m³/s |
| Stroomgebiedopp. | 41 094 km² |
Die Weser (Nederduits: Werser of Wersern) is 'n rivier wat in noordwaartse rigting deur die Noord-Duitse Laagvlakte vloei. Dit dra sy naam vanaf Hannoversch Münden waar sy twee groot bronriviere, Werra en Fulda, saamvloei. Die Weserrivier mond naby die hawestad Bremerhaven in die Noordsee uit.
Die Weser is oor sy hele lengte as federale waterweg geklassifiseer en loop deur die deelstate Hesse, Noordryn-Wesfale, Nedersakse en Bremen. Sy stroomgebied strek egter verder ooswaarts tot in die deelstate Thüringen en Sakse-Anhalt.
Die feit, dat die riviername Weser en Werra dieselfde etimologiese oorsprong het, wys daarop die huidige Werrarivier oorspronklik as boloop van die Weser beskou is, terwyl die korter Fulda eerder as een van sy takriviere geag is. Die name Weser en Werra het eers in die Vroeg-Nieuhoogduitse taalperiode onafhanklik van mekaar ontwikkel.
