Wilma Adamson

in Wikipedia, die vrye ensiklopedie

Wilma Adamson is 'n Suid-Afrikaanse skrywer[1] en is op 30 Desember 1957 op Klerksdorp in die Wes-Transvaal gebore.

Lewe en werk[wysig | wysig bron]

Sy is die tweede jongste van vyf kinders en sy het nog twee susters en twee broers. Wanneer sy ongeveer vier jaar oud is, trek die gesin na Bethal, waar sy in 1963 haar skoolopleiding aan die C.R. Swart Laerskool begin. Aan die begin van 1965 trek hulle terug na Klerksdorp en van 1965 tot 1969 gaan sy skool by Roosheuwel Laerskool en dan matrikuleer sy in 1975 aan die Hoërskool Schoonspruit in Klerksdorp. In 1976 werk sy vir 'n jaar by 'n plaaslike ouditeursfirma as administratiewe klerk en tikster. Sy sluit in Desember 1976 by die polisie aan en werk tot Februarie 1977 as student by die Klerksdorp Polisiestasie in die Vingerafdruk-Afdeling. Sy ondergaan dan haar opleiding by die S.A. Polisiekollege en nadat sy in Julie 1977 uitpasseer word sy uitgeplaas na Seepunt in Kaapstad, waar sy haar man Alec ontmoet. Hy is ook betrokke by die Polisiemag. Hulle trou op 25 Augustus 1978 op Grabouw en het twee dogters, Llani en Stephanie, en 'n seun, Xander. Kort na hulle troue word hulle verplaas na die polisie op Kriel in die Oos-Transvaal. In Februarie 1979 neem albei ontslag uit die polisie en verhuis na Stilfontein in die Wes-Transvaal, waar haar man op die myne gaan werk en hulle eersteling (Llani) op 10 September 1979 gebore word. In 1980 sluit sy weer by die polisiemag aan en dien in die Stilfontein polisiestasie. In 1981 word sy bevorder tot sersant, maar neem weer ontslag aan die einde van 1982 wanneer sy weer swanger raak. Die egpaar se tweede dogtertjie, Stephanie, word op 19 Augustus 1983 gebore. Hulle woon later op Klerksdorp, waar sy die polisie verlaat en vanaf 1989 by die plaaslike koerant, die Klerksdorp Rekord, werk. Hier is sy administratiewe bestuurder en hanteer as joernalis die sport- en motorafdelings. Sy is 'n kranige tafeltennisspeelster wat in 1987 die Goue Weste enkelspeltitel verower. In 1998 is sy en haar man geskei. Sy verhuis in 2012 na Riversdal in die Kaapprovinsie, waar sy vanaf Junie 2012 as joernalis en redakteur by die Suid-Kaap Forum werk.

Skryfwerk[wysig | wysig bron]

Op skool is sy reeds lief daarvoor om opstelle te skryf en tydens haar matriekjaar moedig haar Afrikaans onderwyseres, Tia Sweers, haar aan om 'n verhaal te skryf. Sy doen dit en na-dat die onderwyseres dit nagesien het, moedig sy haar aan om dit te verleng en weg te stuur vir publikasie. Dis egter eers 'n hele aantal jare later wat sy weer aan hierdie manuskrip werk en dit word eindelik in 1986 gepubliseer as “Luitenant Sonja”. Hierdie boek het Sonja Erlank as hoofkarakter. Sy word as stasiebevelvoerder na Kromdraai uitgeplaas, maar die personeel het nie verwag dat hulle 'n vrou as bevelvoerder sou kry nie. Kaptein De Wet Groenewald trek haar aandag, maar misverstande dryf hulle uitmekaar. Sonja wil die plaaslike skietklub verbeter en 'n nuwe gebou en moderne skietbaan laat oprig sonder dat die mense agterkom dat sy die dogter van die miljoenêr, Steyn Erlank, is. As iemand dit agterkom, sal De Wet miskien net in die geld en nie meer in haar as vrou belangstel nie. Die dokter, Adéle de Wet, sluit in “Konstabel van harte” by die polisiemag aan as 'n konstabel en word na Kroondal se polisiestasie uitgeplaas.[2] Op Kroondal ontmoet sy vir Dawid Basson. Dit is liefde met die eerste oogopslag, maar net voordat die troudatum vasgestel word, ontstaan daar 'n misverstand tussen hulle wat groot probleme tot gevolg het. Adéle word dan deur 'n bende dwelmsmokkelaars ontvoer. In “Motorfietsrabbedoe” is Kelly Andrews met haar leerklere op 'n veldmotorfiets en kortbroek en T-hemp in die tuin 'n verskrikking vir die mense van die dorpie Doringkrans. Sy en die verkrampte kaptein Brian Newton is van die eerste dag af haaks. Kelly wys egter haar staal wanneer sy te doen kry met kokaïensmokkelary, 'n ongewenste tienerswangerskap, wilddiefstalle en 'n verdagte plaasbestuurder.[3]

Publikasies[wysig | wysig bron]

  • 1986: Luitenant Sonja
  • 1990: Konstabel van harte
  • 1997: Motorfietsrabbedoe
  • 2000: Dokter Samantha se geheim

Verwysings[wysig | wysig bron]