X 2000

in Wikipedia, die vrye ensiklopedie

X 2000 is die handelsmerk van 'n Sweedse hoëspoedtrein wat in 1990 deur die Sweedse spoorwegmaatskappy Statens Järnvägar (SJ) in gebruik geneem is. Sy huidige roetenetwerk strek van Stockholm tot Falun en Östersund in die noorde, Arvika, Uddevalla en Göteborg in die weste, en Malmö en die Deense hoofstad Kopenhagen in die suide.

Geskiedenis[wysig | wysig bron]

'n X 2000-treinstel

Aangesien Swede met sy relatief lae bevolkingsdigtheid duidelik van Sentraal-Europa se digbevolkte lande verskil, is duur hoëspoedspoorlyne hier ekonomies nie vatbaar nie, terwyl die bou van só 'n hoëspoednetwerk in die bergagtige Sweedse landskap met sy talle heuwels ook in tegniese opsig baie koste-intensief sou wees. Die koste vir só 'n verbinding tussen die twee grootste stede in die land, Stockholm en Göteborg, is in die 1990's op sowat 9 miljard Sweedse kroon (SKR) beraam (rytuie ingesluit).

SJ het derhalwe besluit om 'n kanteltreinstel van die X2-reeks te gebruik wat in staat is om op die bestaande spoorweglyne hoër reissnelhede te bereik.

Tot in 1989 is twintig treinstelle bestel wat met lugreëling en radiotelefoon toegerus was. Die beplande maksimale reissnelheid was 200 kliometer per uur. Tien van die twintig treinstelle was bestem vir die roete tussen Stockholm en Göteborg, terwyl die res op die roetes tussen Stockholm en Malmö en tussen Stockholm en Östergötland sou ry. Die treinstelle is teen 'n koste van 100 miljoen SKR in ABB se Västerås-aanleg vervaardig. Vir hulle ontwikkeling is tot in die jaar 1989 twee miljard SKR bestee.[1]

Die eerste gereelde treindiens tussen Stockholm en Göteborg is vanaf September 1990 bedryf. Die eerste reeks van twintig treinstelle is tot in die jaar 1994 in gebruik geneem.[2] Die treine ry tans op verskillende roetes wat van Kopenhagen tot by Härnösand in Noord-Swede strek.

Verwysings[wysig | wysig bron]

  1. In Schweden bald Tempo 200. In: Die Bundesbahn, nommer 12 (1989), bl. 1116
  2. Schwedische Staatsbahn bestellt 14 weitere ABB X2000. In: Eisenbahntechnische Rundschau, jaargang 1993, nommer 3, bl. 127

Eksterne skakels[wysig | wysig bron]

TGV Hoëspoedtreine
Acela Express | Aérotrain | AGV | AVE | Eurostar | Eurostar Italia | Flytoget | Gautrein | InterCityExpress | JR-Maglev MLX01
Magneetsweeftreine | Pendolino | Sapsan |Shinkansen | Singapoerse MRT | TGV | Thalys | Treno Alta Velocità | Transrapid | X 2000