Allan McLeod Cormack

Allan MacLeod Cormack
Gebore	(1924-02-23)23 Februarie 1924 Johannesburg, Suid-Afrika
Oorlede	7 Mei 1998 (op 74) Winchester, Massachusetts
Nasionaliteit	Suid-Afrika  Verenigde State
Vakgebied	Fisika, geneeskunde
Instelling(s)	Universiteit van Cambridge
Alma mater	Universiteit van Kaapstad (B.Sc.)
Bekend vir	rekenaartomografie
Toekennings	Nobelprys vir Fisiologie of Geneeskunde (1979) National Medal of Science (1990)

Allan MacLeod Cormack (23 Februarie 1924 – 7 Mei 1998) was 'n Suid-Afrikaansgebore natuurkundige. In 1979 wen hy en Godfrey Hounsfield die Nobelprys vir Fisiologie of Geneeskunde vir die ontwikkeling van rekenaartomografie (mediese CT-skandering). In 2002 is die Orde van Mapungubwe postuum aan hom toegeken vir sy bydrae tot die wetenskap.

Beknopte biografie

Cormack is op 23 Februarie 1924 in Johannesburg gebore. Hy was die jongste van drie kinders. Sy ouers, George Cormack en Amelia McLeod Cormack, het kort voor die Eerste Wêreldoorlog uit die noorde van Skotland na Suid-Afrika geëmigreer. Hy word aan die Rondebosch Hoërseunskool in Kaapstad onderrig, waar hy onder andere lid van die debat- en die tennisspan was. Vervolgens studeer by natuurkunde aan die Universiteit van Kaapstad en verwerf sy B.Sc. in 1944. Daarna studeer hy kristallografie aan dieselfde universiteit, en verwerf 'n meestersgraad in 1945.

Van 1947 tot 1949 was hy 'n navorsingstudent aan die Universiteit van Cambridge, waar hy by die Cavendish-laboratorium onder Otto Frisch aan probleme met helium-6 werk. Hier ontmoet hy sy toekomstige vrou, Barbara Seavey, 'n Amerikaanse natuurkundestudent.

In 1950 keer hy na die Universiteit van Kaapstad terug. Ná 'n sabbatsjaar aan die Harvard-universiteit in 1956–57, besluit hy en sy vrou om na die Verenigde State te verhuis. Cormack begin hier as 'n professor aan die Tufts-universiteit te werk. In 1966 kry hy Amerikaanse nasionaliteit.

Hoewel hy hom hoofsaaklik op deeltjiefisika toegespits het, het hy ook in X-strale belanggestel. Hy ontwikkel die teoretiese beginsels vir CT-skandering, 'n metode op wiskundige analise gegrond, waarmee akkurate beeld-rekonstruksie van X-strale verkry kan word. Sy resultate is onderskeidelik in 1963 en 1964 in twee artikels in die Journal of Applied Physics gepubliseer. Dit kry egter min aftrek nie, totdat Hounsfield en sy kollegas die eerste CT-skandeerder in 1971 met behulp van Cormacks se teoretiese berekeninge bou. Cormack en Hounsfield het die Nobelprys vir hul afsonderlike bydrae tot die ontwikkeling van die CT-skandeerder gedeel.

Cormack is op 7 Mei 1998 in Winchester (Massachusetts) aan kanker oorlede. Hy was 74 jaar oud.