Baš Čelik

in Wikipedia, die vrye ensiklopedie

Baš Čelik (Serwies: Баш-Челик; of Harde Staal) is ’n Serwiese volksverhaal.

Opsomming[wysig | wysig bron]

’n Koning het drie seuns en drie dogters. Op sy sterfbed laat hy sy seuns belowe dat hulle hulle susters aan die eerste persone sal gee wat vra om met hulle te trou. Een nag vra ’n bulderende stem om met die een suster te trou. Die twee oudste broers huiwer, maar die jongste een voldoen aan sy pa se versoek en oorhandig haar. Die volgende twee nagte gebeur dieselfde, tot al drie susters aan geheimsinnige vreemdelinge gegee is. Die drie broers besluit om hul susters te gaan soek.

Tydens hulle reise veg hulle teen meerkoppige slange. Die jongste broer verslaan ook nege reuse wat die streek terroriseer. Eindelik red hy die koning se dogter nadat sy deur ’n slang gepik is. Hy word toegelaat om met die prinses te trou en word een van die koning se gunstelinge. Hy woon in die prinses se kasteel en mag in al die kamers ingaan, behalwe een wat met kettings gesluit is. Eendag toe sy vrou weg is, gaan hy in die kamer in en sien ’n gevangene wat met kettings vasgemaak is. Die man sê sy naam is Baš Čelik en vra drie glase water. Elke keer dat die prins vir hom ’n glas water gee, kry hy ’n ekstra lewe by. Toe hy die derde glas water vir die man gee, herwin dié skielik sy krag, breek die kettings en vlieg weg met die prins se vrou.

Nou het die prins ’n nuwe taak: om sy vrou te red. Op sy pad ontdek hy dat sy susters getrou het met die Lords van die Drake, Valke en Arende. Hy probeer drie keer om sy vrou terug te kry. Elke keer verloor hy een van die lewens wat Baš Čelik vir hom gegee het in ruil vir ’n glas water. Die vierde keer sterf hy, maar sy lewe word gered deur sy swaers – hulle wek hom op met die towerwater van die Jordaanrivier. In dié stadium ontdek die prinses dat Baš Čelik nie doodgemaak kan word nie omdat sy lewe in ’n voël in die hart van ’n jakkals in ’n woud op ’n hoë berg is. Met die hulp van die Lords verslaan die prins eindelik vir Baš Čelik en red sy vrou.

Verwysings[wysig | wysig bron]

Hierdie artikel is merendeels vertaal vanaf die Engelse Wikipedia-artikel en:Baš Čelik

Eksterne skakels[wysig | wysig bron]