Christiaan Barnard

in Wikipedia, die vrye ensiklopedie
Spring na: navigasie, soek
Christiaan Barnard
’n Beeld van die betrokke persoonlikheid.
Christaan Barnard (1968)

Geboortenaam Christiaan Neethling Barnard
Gebore 8 November 1922
Oorlede 2 September 2001 (op 78)
Titel Prof. dr.
Bekend vir Eerste suksesvolle menslike hartoorplanting
Groote Schuur-hospitaal, waar die eerste hartoorplanting gedoen is.

Christiaan Neethling Barnard (Beaufort-Wes, 8 November 19222 September 2001) was 'n Suid-Afrikaanse hartchirurg wat roem verwerf het nadat hy die wêreld se eerste suksesvolle mens-tot-mens-hartoorplanting gedoen het.

Kinderjare en jongdae[wysig]

Chris Barnard is op Beaufort-Wes, Suid-Afrika gebore. Hy was een van vier seuns van 'n sendingpredikant, eerw. A.H. Barnard (sien NG gemeente Beaufort-Wes). Hy het geneeskunde aan die Universiteit van Kaapstad studeer. Sy eerste werk was as huisdoktor op Ceres.

Nagraadse loopbaan[wysig]

Hy behaal sy meestersgraad in 1953 aan die Universiteit van Kaapstad nadat hy in 1951 teruggekeer het na die Universiteit. In 1953 verwerf hy ook sy doktorsgraad in medisyne. Hy verwerf 'n nagraadse studiebeurs aan die Universiteit van Minnesota in 1956. Hier toon hy sy eerste belangstelling in hartlongsjirurgie. Hy verwerf sy meesters- en doktorsgraad aan dié Universiteit gedurende 1958 en keer terug na Suid-Afrika.

Groote Schuur-Hospitaal[wysig]

Terug in Suid-Afrika word hy aangestel as 'n kardiotorakssjirurg by die Groote Schuur-hospitaal. Hy ontwerp 'n nuwe hartklep, begin met opehartsjirurgie en eksperimenteer met hartoorplantings op honde. Hy word bekend as 'n briljante sjirurg. Hy doen die wêreld se eerste hartoorplanting in 1967 by Groote Schuur. Die pasiënt was Louis Washkansky. Hy het Denise Darvall se hart ontvang. 'n Span van dertig mense staan hom by tydens die operasie wat nege uur lank duur. Alhoewel die operasie suksesvol was sterf Washkansky aan longontsteking agttien dae na die operasie. Chris Barnard word oornag wêreldberoemd.

Gedurende 1972 word hy 'n Professor aan die Universiteit van Kaapstad. Hy doen nog hartoorplantings; Dorothy Fischer leef 12 jaar nadat sy haar hart ontvang het. In 1974 doen hy die wêreld se eerste babahartoperasie.

Openbare loopbaan[wysig]

As gevolg van artritis wat dit vir hom moeilik maak om operasies uit te voer bedank hy in 1983 uit die diens van die Universiteit. Hy was 61 jaar oud. Hy spits hom toe op skryfwerk en bied lesings aan wêreldwyd. Hy help ook om 'n nuwe hartoorplantingsprogram in Oklahoma, VSA te vestig. Hy ontvang verskeie toekennings van lande en organisasies wêreldwyd. Hy sterf tydens 'n besoek aan Ciprus in 2001 na 'n asma aanval.

Persoonlike lewe[wysig]

Prof. Chris Barnard was drie keer getroud. Sy broer, Marius, 'n kardioloog, was deel van Chris se hartspan.[1]

Verwysings[wysig]

  1. Uys, Isabel. Die Suid-Afrikaanse Gids- feite en wenke. 2009. ISBN 978-1-86919-324-9