Hoërskool Voortrekker, Kenilworth
Die Hoërskool Voortrekker in die Kaapstadse voorstad Kenilworth is 'n voormalige Afrikaansmedium hoërskool wat tans (2010) onderrig aan in Afrikaans en Engels bied aan 379 leerders, 31 meer as in 2008. Die verhouding van Afrikaanse tot Engelse leerders is sowat 1:2. Die tendens is egter dat die Afrikaanse leerders minder en die Engelse leerders meer word, soos ook die geval is by die Hoërskool Groote Schuur in Nuweland, wat sedert die invoer van Engels as onderrigmedium byna uitsluitlik Engels geword het en die Hoërskool Zwaanswyk in Retreat, wat sedert 2007 ook parallelmedium geword het.
Die skool het in die middel van die dekade na 1930 uit die Laerskool Simon van der Stel as die Sekondêre Skool Simon van der Stel ontstaan. Die naam is waarskynlik omstreeks 1938 ten tyde van die eeufeesherdenking van die Groot Trek na Hoërskool Voortrekker verander. Simon van der Stel was dekades lank Voortrekker se voederskool, maar sedert die hoërskool van omstreeks 2005 drasties begin verengels het, woon die oudleerders van die laerskool nou die Hoërskool Jan van Riebeeck in Tamboerskloof by waarheen hulle daagliks per bus vervoer word.
