NG gemeente Chingola
Die NG gemeente Chingola op die gelyknamige dorp in die Koperstreek-provinsie van Zambië, het op 26 Julie 1950 van die NG gemeente Mufulira afgestig.
Die hele Koperstreek, met Nkana as middelpunt, was eers een gemeente van die Nederduitse Gereformeerde Kerk. Al die kerkraadslede moes toe van Luanshya, Ndola, Mufulira en Chingola na Kitwe (die setel van die NG gemeente Nkana) vir kerkraadsvergaderings kom. Dr. M.W. Retief was die eerste predikant van die Koperstreek en moes elke Sondag na een van die vyf sentrums gaan om 'n diens daar te hou. Omdat Chingola die minste lidmate gehad het, was dit die stiefkind wat net elke twee maande 'n leraar gesien het. Intussen moes ouderlinge die eredienste hou.
Toe Mufulira afgestig is (met Chingola binne die gemeentegrense), het dit beter gegaan, aangesien die predikant van daardie gemeente darem elke 14 dae Chingola toe gekom het. Mufulira se eerste leraar was ds. T.A. Theron ná die gemeente tien maande van sy stigting af vakant was. Hy het op Mufulira gewoon en daarom het ene ds. Strydom, afgetrede Sendingsekretaris, op Chingola die gemeente kom bedien. Hy het hard gewerk en uiteindelik die gemeente gehelp om die stoute skoene aan te trek en met 150 lidmate af te stig met net 'n pastorie en 'n kerkstandplaas ('n erf om 'n kerkgebou op te rig).
Na die gemeente meer as 'n jaar lank vakant was en verskeie vrugtelose beroepe uitgebring is, het prop. C.A. van Zyl die beroep aanvaar en hierheen gekom as eerste leraar.
Die gemeente is omstreeks 1970 by die NG gemeente Nkana ingelyf, wat op sy beurt by NG gemeente Lusaka ingelyf is. Sedert 2008 is die gemeente deel van die herlewing van Nkana, wat nou bekend staan as Dutch Reformed Church in Zambia Nkhana.
Enkele leraars[wysig | wysig bron]
- Christoffel Alwyn van Zyl, 1951 - 1957
- Wilhelm Louis du Randt, 1962 - 1964
Sien ook[wysig | wysig bron]
Bronne[wysig | wysig bron]
- Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.Β
- Gaum, Frits (red.), Jaarboek van die Nederduitse Gereformeerde Kerke 1990, Pretoria: Tydskriftemaatskappy van die Nederduitse Gereformeerde Kerk, 1989.