Nuwe Nasionale Party

in Wikipedia, die vrye ensiklopedie
Spring na: navigasie, soek

Die Nuwe Nasionale Party (NNP) is in 1997 gevorm vanuit die ou Nasionale Party, nadat die party homself onttrek het aan die Regering van Nasionale Eenheid saam met die ANC. Die naamverandering is gedoen in 'n poging om die party te skei van sy verlede met die instelling en onderhoud van apartheid, en om die party te vernuwe as 'n gematigde, nie-rassige federale party.

Die eerste leier was FW de Klerk, wenner van die Nobelprys vir Vrede tesame met Nelson Mandela, vir sy rol in die afskaffing van apartheid. Die laaste leier van dié party was Marthinus van Schalkwyk. Die party het 'n samewerkingsooreenkoms met die ANC gesluit, wat baie van sy lede ontnugter het.

In die 1999 Algemene Verkiesing was die party feitlik uitgewis op nasionale vlak, maar het baie invloed behou in die Wes-Kaap. Tydens die Suid-Afrikaanse algemene verkiesing van 2004 het meeste van die oorblywende ondersteuning die party verlaat, deels weens ongelukkigheid oor die party se alliansie met die ANC, deels oor wat beken geword het uit die Waarheids-en-Versoeningskommissie. Die nasionale ondersteuning van 6.9% het in 1999 na 1.9% geval (dit was 20.4% in 1994, toe nog as die Nasionale Party). Met die voorheen regerende party nou slegs die sesde grootste party in die land word vrae gevra oor die party se langtermyn toekoms, asook die leierskap van Van Schalkwyk. Ten spyte van die party se powere uitslag in die 2004 verkiesing is Van Schalkwyk die pos van Minister van Omgewingsake en Toerisme toegeken weens die alliansie wat hy gesluit het met die ANC.

Op 9 April 2005 het die federale raad van die NNP amptelik besluit om die party te ontbind. Die party het ophou bestaan om middernag van die dag waarop uitslae aangekondig was van die plaaslike regeringsverkiesings, wat plaasgevind het op 1 Maart, 2006.

Verkiesingsresultate[wysig]

Verkiesing Stemme % Setels
1994 3,983,690 20.39 82
1999 1,098,215 6.87 28
2004 257,824 1.65 7