Odin

in Wikipedia, die vrye ensiklopedie
Spring na: navigasie, soek
Odin van Lejre (900 AD) se twee rawe (Huginn en Muninn) - Roskilde Museum, Denemarke, 2009
Georg von Rosen - Oden som vandringsman, 1886 (Odin die wandelaar)
Odin of Wodan (1832)
Odin, se twee rawe (Huginn en Muninn) en sy twee wolwe (Geri and Freki)
Foto uit die boek "Walhall", Felix en Therese Dahn, 1888

Odin of Wodan word dikwels beskou as die Oppergod in die Germaanse godsdiens. Hy is ook onder die volgende Noord-Germaanse name bekend: Oudnoors: Óðinn, Sweeds en Deens: Oden. Wes-Germaanse name van hierdie God is Weda (Oud-Fries), Woden (Angelsaksies en Oudsaksies), Wodan (Oud-Frankies), Wuodan (Alemannies), Wotan of Wothan (Germaans) en Guodan (Lombardies).

In Afrikaans, Nederlands, Engels, Sweeds, Noors en Deens is 'Woensdag' na hierdie god vernoem. In Duits was Woensdag aanvanklik ook bekend as 'Wotanstag', maar onder invloed van die Christelike Kerk het dit uiteindelik 'Mittwoch' (Midweek) geword.

Die woord weet (weten) is verwant aan die naam Wodan (van Oudgermaanse Watanaz).

Die naam Wodan as Oppergod van ons voorouers was algemeen bekend in Wes-Europa, maar in Noord-Europa was hy meer bekend as Odin. Wodan/Odin woon in Gladsheimr maar ook soms in Valaskjálf vanwaar hy die hele wêreld kan sien. Ook beskik hy oor ’n spesiale saal (hal) bekend as die Walhalla. Die Walhalha is die hemel van die gestorwe krygers. Hulle word versamel en gekeur deur die Walkure.

Die naam van sy vrou is Frigg, maar hy het ook minnaresse gehad. Van sy bekendste seuns was ook bekende Germaanse gode, naamlik: Donar of Thor, Baldr en die blinde Hodr (ook bekend as Hod of Hodur). Met Jörd (Aarde) het hy die seun Donar verwek en met die Reusin Grid die seun Vidar. Met Rindr het hy die seun Vali verwek.

Wysheid[wysig]

Wodan/Odin is beskou as ’n Alwetende en Alwyse god. Hy het ook bekend gestaan as Alvader of Almagtige Vader en daar is met ontsag oor hom gepraat. Vir Wodan was kennis mag en het hy voortdurend gesoek en gestreef na Kennis en Waarheid. Vir hierdie drang na kennis moes hy 'n oog afstaan aan die dwerg Mimir om uit die Bron van Wysheid te kon drink. Wodan/Odin sou ook 9 dae lank aan die Wêreldboom Yggdrasill gehang het as 'n self-offer vir die verkryging van die Geheim van Kennis. Hy sou homself ook met 'n spies gesteek het terwyl hy aan die boom gehang het (selfkastyding). Wodan/Odin het ook bekend gestaan as die Wandelaar (Wand = heilige staf). Die staf is 'n simbool vir wysheid en mag.

Kenmerke[wysig]

Wodan/Odin word aan die volgende herken: Hy was fors gebou met ‘n lang wit baard en een oog. Hy was geklee in ‘n lang mantel en het ‘n hoed gedra. Hy het ‘n spies (Gungnir), ‘n mantel, ‘n slaprandhoed en ‘n ring (Draupnir). Vanaf hierdie ring drup daar elke negende nag, agt goue ringe af. Hierdie 8 goue ringe staan simbool vir die volgende 8 dae, waarna weer 'n heilige nag aanbreek. Die ou Germaanse week het uit 9 nagte bestaan. Odin/Wodan het twee kraaie (Huginn en Munnin) wat vir hom nuus bring. Sleipnir is sy agtbenige perd waarmee hy soos 'n stormwind deur die lug kan vlieg. Freki en Geri is Odin/Wodan se twee wolwe wat hom op die slagveld begelei.

Skepper[wysig]

Wodan/Odin dateer uit die ystydperk. In hierdie tyd lek die oerkoei Audumla volgens oorlewering die Reus Buri/Búri los uit die ys. Hierdie Buri is die stamvader van alle gode. Uit Buri het Borr gekom en hy en die Reusin Bestla kry drie seuns: Wodan/Odin, Vili en . Dit was die eerste gode. Hulle het die eerste twee mense geskape, nl. Ask en Embla. Talle Germaanse koningsgeslagte (byvoorbeeld Volsung) beweer dat hulle van Odin/Wodan afstam.

Wodan/Odin vorm ’n goddelike drie-eenheid met Vile en Vé. Sommige bronne vermeld egter ’n drie-eenheid met Hoenir en Lodur.

Einddoel[wysig]

Wodan/Odin berei homself voor vir die einde van die wêreld: Ragnarok. Krygers wat tydens hulle aardse lewe in die stryd gesterf het, word in die Einherier (elitekorps) opgeneem. Hierdie Einheri’s oefen elke dag. Wanneer die einde van die wêreld kom, sal hierdie leër saam met die gode veg teen duistere magte onder leiding van Loki. In die Ragnarok kom Wodan/Odin te staan teen Fenrir, die Bose Wolf. Wodan/Odin verloor egter hierdie tweestryd, maar die dapper seun van Wodan/Odin, Vanir, neem wraak deur Fenrir dood te maak.

Na die Ragnarok, kom daar ’n 'Nuwe Wêreld'. Die 'Ou Wêreld' gaan onder en vergaan.

Kerstening[wysig]

Met die koms van die Romeinse Christendom na Wes- en Noord-Europa, is die Germaanse godsdiens langsamerhand verdring. Die ou Germaanse Gode is met die koms van die Christendom as ongewens verklaar en is hierdie ou Germaanse Gode voortaan as duiwelsfigure beskou.

Bibliografie[wysig]

  • Van Egir tot Ymer: Personages en thema’s uit de Germaanse en Noorse mythologie, Paula Vermeyden en Arend Quak, 2000, SUN - Nijmegen.

Sien ook[wysig]

Commons-logo.svg
Wikimedia Commons het meer media verwant aan:
Odin (kategorie)