Die vaalboskat (Felis silvestris lybica) is die voorvader van vandag se mak katte. Hulle is ’n subspesie van F. silvestris en dit lyk asof hulle ongeveer 131 000 jaar gelede afgestam het van ’n ander subspesie.
Die jagluiperd (Acinonyx jubatus) is die vinnigste landsoogdier en kan snelhede van tussen 112 en 120 km/h bereik oor kort afstande van ongeveer 450 meter. Hulle kan van 0-100 km/h versnel binne drie sekondes, wat vinniger is as die meeste supermotors.
Die Bengaalse kat is ’n relatief nuwe hibridiese huiskatras wat ’n kruising is tussen ’n huiskat en Asiatiese luiperdkat (Prionailurus bengalensis). Hulle het die kleurpatroon en lyf van ’n wilde kat, maar die sagte geaardheid van ’n huiskat, mits hulle minstens drie geslagte verwyder is van die oorspronklike luiperdkat.
