Rapport

in Wikipedia, die vrye ensiklopedie
Spring na: navigasie, soek
Rapport se Kaapse kantoor is geleë op die 16de verdieping van die Naspers Sentrum.
Rapport het vier Nuusbusse waarmee die koerant homself op pad adverteer.

Rapport is 'n Afrikaanse koerant wat elke Sondag deur Naspers uitgegee word. Rapport is in 1970 gestig, word landswyd versprei, en het 'n sirkulasie van 296 237 eksemplare gehad in die tydperk van Julie tot Desember 2007, maar in die tweede kwartaal van 2013 net 192 328, sowat 'n kwart van die gesamentlike sirkulasie van die twee Sondagblaaie waaruit Rapport ontstaan het. Die koerant se leuse lui: "Ons praat jou taal".[1]

Rapport het ontstaan nadat die Sondagkoerante Die Beeld en Dagbreek, wat onderskeidelik deur Nasionale Pers en Perskor besit is, saamgesmelt het in 'n 50:50-samewerking tussen die twee mededingers. Die naam Beeld is later aan 'n dagblad vir die Johannesburgse mark in 1974 gegee, wat die persstryd in die destydse Transvaal opnuut laat opvlam het.[2][3]

Nadat Caxton/CTP in 1999 met Perskor saamgesmelt het is Perskor se aandele in Rapport saam met City Press aan Naspers verkoop om Naspers alleeneienaars van die Sondagkoerant te maak.[4]

Rapport se sirkulasie daal reeds sedert sy stigting. Waar dit in 'n stadium meer as 500 000 was, was dit in die laaste helfte van 2007 minder as 300 000 en teen einde 2012 sowat 210 000. In 2007 was dit die eerste keer dat die gesamentlike sirkulasie van die Afrikaanse dagblaaie die sirkulasie van Rapport oortref het: Die Burger, Beeld en Die Son het toe elk sowat 100 000 eksemplare per dag en Volksblad sowat 30 000 verkoop, vir 'n totaal van 330 000. Op Rapport se hoogtepunt in die vroeë jare 70 was die gesamentlike sirkulasie van die indertydse agt Afrikaanse dagblaaie (daar is tans net vier, as Die Burger se uitgawes vir die Wes-Kaap en die Oos-Kaap as een gereken word) sowat 305 000. Die destydse agt dagblaaie was Die Burger, Beeld, Oosterlig en die Volksblad van Naspers en Die Vaderland, Die Transvaler, Oggendblad en Hoofstad van Perskor.

Waldimar Pelser het in 2013 die leisels by Bokkie Gerber oorgeneem as redakteur. Gerber het op sy beurt Liza Albrecht opgevolg[5]

Bronne[wysig]

Eksterne skakels[wysig]

Verwysings[wysig]