Renosterfontein-melkhoutboom
Die Rhenosterfontein-melkhoutboom is 'n melkhoutboom (Sideroxylon inerme) in die Overberg op die plaas Rhenosterfontien, 5 km buite Bredasdorp op die pad na Swellendam. Hierdie boom is weens sy besondere omvang en ouderdom op 17 Desember 1993 tot monument verklaar.
Die boom is oor die 1 000 jaar oud en het 'n stamomtrek van 3,22 m, 'n stamdeursnee van 1,02 m, 'n kroonhoogte van 9 m en 'n kroonbreedte van 20 m. Melkhoutbome is beskerm in Suid-Afrika en geen deel mag van so 'n boom afgekap word sonder die toestemming van die Departement Bosbou, Visserye en die Omgewing (DBVO) nie.
Drie ander melkhoutbome is tot monumente verklaar, naamlik die Poskantoorboom in Mosselbaai, die Verdragboom in Woodstock en die Fingo-melkhoutboom by Peddie. Die grootste melkhoutboom in die land staan op die plaas Langbosch in die omgewing van Stilbaai by die koőrdinate 34° 22.302’S en 21° 19.245’O. Hierdie boom is 14m hoog en het op 'n hoogte van 80cm 'n stamomtrek van 10m.
Bibliografie[wysig | wysig bron]
- Die Burger, 6 Desember 2003.
- www.championtrees.co.za