Robin Hawkins

Robin Hawkins is in 1954 in Durban gebore. Hy gaan daar skool in die drie Port Natalskole, waar sy ma Afrikaans gee. Hy is bekend as skrywer.

Lewe en Werk

Hierna studeer hy verder aan die Universiteite van Natal en Stellenbosch. Op Stellenbosch is hy lid van die Letterkundige Laboratorium van D.J. Opperman. Sy grootste belangstelling is in musiek en hy stig verskeie musiekgroepe, waaronder S#ARP, The Banned, wat later hulle naam na Cold Front verander, The Poison Kandie Gang en uiteindelik Artvark. By Artvark is die digter Willem S. van der Merwe een van die groeplede. Robin komponeer musiek, skryf lirieke en speel klavier, baskitaar, tromme en elektriese klawerbord. Hy bly in Rondebosch in Kaapstad.

Skryfwerk

Terwyl hy nog op skool is begin hy gedigte skryf in beide Engels en Afrikaans. Sy tweetalige toneelstuk “The lucky dip” verwerf in 1976 die wisselbeker vir die beste produksie by die USAT-fees op Stellenbosch. Sy verse word in 1984 in “Visier” opgeneem, waar die militêre wêreld die agtergrond van ’n aantal daarvan vorm en die toonaard dikwels harde sinisme is. Die gedig “maandans in die voorhuis” is ’n hoogtepunt met sy byeentrek van skerwe uit verskeie gebroke wêrelde. Hy gee nie ’n selfstandige bundel uit nie en publiseer hierna sy werk op die Internet. Later neem Gerrit Komrij van sy gedigte op in die bloemlesing “Die Afrikaanse poësie in ’n duisend en enkele gedigte”.

Bronne

Boeke

• Kannemeyer, J.C. “D.J. Opperman: ’n Biografie”, Human & Rousseau, Kaapstad en Pretoria, Eerste uitgawe 1986
• Kannemeyer, J.C. “Die Afrikaanse literatuur 1652-2004”, Human & Rousseau, Kaapstad en Pretoria, Eerste uitgawe 2005

Tydskrifte en Koerante

• Hawkins, Robin “‘Terroris’ se taal nie goed genoeg” “Die Burger” 23 Oktober 2000

Internet

• Joubert, Emile Die Burger: http://m24arg02.naspers.com/argief/berigte/dieburger/1991/11/15/4/10.html^{[dooie skakel]}
• Joubert, Emile Die Burger: http://152.111.1.87/argief/berigte/dieburger/1991/11/30/6/2.html

Resensies

Visier

• Brink, André P. “Rapport” 3 Februarie 1985
• Cloete, T.T. “Tydskrif vir Letterkunde” Jaargang 23 no. 2, Mei 1985
• Grové, A.P. “Tydskrif vir Geesteswetenskappe” Jaargang 25 no. 3, September 1985
• Le Roux, André “Die Burger” 31 Januarie 1985