Sotsji
|
Sotsji |
|
|---|---|
| Kaart | Wapen |
 |
|
.png) |
|
| Vlag | |
.png) |
|
| Land |  Russiese Federasie |
| Deelgebied | Krasnodar-krai |
| Federale distrik | Suid-Rusland |
| Koördinate | |
| Stigting | 1838 (Aleksandrija) |
| Stadstatus | 1917 |
| Oppervlak: | |
| - Totaal | 3 508 vk km |
| Hoogte bo seevlak | 0-700 m |
| Bevolking: | |
| - Totaal (2010) | 343 300 |
| - Bevolkingsdigtheid | 98/vk km |
| Tydsone | UTC +3 |
| Burgemeester | Wiktor Kolodjasjni |
| Amptelike Webwerf | sochiadm.ru |
Sotsji (Russies: Сочи) ['soʨɪ]) is 'n Russiese vakansieoord in Krasnodar-krai net noord van die Russiese Federasie se suidelike grens met 343 300 inwoners volgens die sensus van 2010. Die stad strek oor 'n lengte van meer as 140 kilometer langs die kus van die Swartsee en lê aan die voet van die Kaukasus-bergreeks se sneeubedekte bergspitse. Sotsji is in Julie 2007 deur die Internasionale Olimpiese Komitee as die gasheerstad van die XXII Olimpiese Winterspele 2014 gekies.
Geografie [wysig]
Sotsji se stadsgebied, wat oor 'n lengte van 145 kilometer langs die noordoostelike kus van die Swart See strek, is een van die langstes ter wêreld.
Die Sjepsi-rivier suid van Toeapse vorm die noordwestelike grens van Sotsji, die Psou-rivier sowel Sotsji asook Rusland se suidoostelike grens met die Republiek Abchasië, wat voor sy eensydige onafhanklikheidsverklaring deel uitgemaak het van Georgië. Met 'n bevolkingsdigtheid van minder as 100 inwoners per vierkante kilometer is Sotsji een van die yls bevolkte stede ter wêreld.
Die voorgebergte van die Kaukasus-bergreeks strek tot digby die kus en bereik hier reeds hoogtes van omtrent 1 000 meter. Danksy die beskermde ligging word Sotsji se klimaat deur baie matige winters gekenmerk.
Die hoofberge van die Kaukasus sowat 25 tot 40 kilometer van die kus af bereik egter hoogtes van meer as 3 000 meter soos byvoorbeld die bergspits Zachwoa (3 345 meter).
'n Aantal bergriviere soos Psesoeapse, Sjache, Sotsji en Msimta vloei deur Sotsji se stadsgebied en mond hier in die Swartsee uit.
Klimaat [wysig]
Danksy sy ligging word die kusgebied van Sotsji deur 'n subtropiese klimaat met lang en baie warm somers, warm najare en kort en matige winters gekenmerk.
Die gemiddelde jaarlikse temperatuur is +14 °C. Januarie en Februarie is die koudste maande van die jaar met sowat +6 °C, Julie en Augustus die warmstes met sowat +23 °C. Die laagste temperatuur wat ooit in Sotsji aangeteken is, was -13,4 °C op 25 Januarie 1892, die hoogste +39 °C op 28 Julie 1981. Op 22 Januarie 1948 het die kwik tot +21,2 °C gestyg, terwyl temperature in die maande Julie en Augustus nog nooit benede +10 °C gedaal het nie.
Die gemiddelde temperatuur van die Swartsee se water in Augustus is +24,1 °C.
Die gebied kry 'n gemiddelde jaarlikse reënval van meer as 1 600 millimeter. Die meeste reën val in die wintermaande met 'n maksimum van 190 millimeter in Desember en Januarie. Die minimum word in die somermaande tussen Mei en Junie met sowat 90 tot 100 millimeter bereik. Gewoonlik is daar net enkele reëndae met sterk, kort reënbuie.
Die wintertemperature daal dikwels tot vriespunt in die berggebiede soos Krasnaja Poljana (600 meter bo seevlak), waar die Olimpiese Winterspele 2014 sal plaasvind. Die skigebiede is tussen die middel van Januarie en Maart deurgaans met sneeu bedek, en die sneeu is 2 meter of selfs dieper in Maart. In die hoër geleë berggebiede duur die skiseisoen selfs van November tot die begin van Junie.
