Vingis-park

in Wikipedia, die vrye ensiklopedie
Spring na: navigasie, soek
Die amfiteater in die Vingis-park, met die televisietoring van Vilnius in die agtergrond.

Vingis-park is die grootste park in die Litause hoofstad Vilnius met 'n oppervlakte van 162 hektaar. Die park, wat in 'n rivierkronkel van die Neris geleë is, word onder meer vir konserte en sportgebeurtenisse gebruik, maar vervul daarnaas ook die funksie van 'n vermaaklikheidspark en beskik oor koffiekroeë en restaurante. Die Vingis-stadion, wat in 'n beboste deel van die park geleë is, is 'n trekpleister vir sportgeesdriftiges.

Die park se geskiedenis dateer al eeue terug. In 1965 is die gebied omgeskep tot sy huidige vorm om as vergaderplek vir politieke byeenkomste en terrein vir konserte te dien. In die laat 1980's het verskeie groot byeenkomste van die Litause onafhanklikheidsbeweging hier plaasgevind, waaronder dié op 23 Augustus 1988 toe 250 000 mense hier vergader het.[1]

Vingis-park: kaart van paaie en voorwerpe.

Die park beskik oor 'n botaniese tuin en 'n amfiteater met toneel (Litaus: Vingio parka estrada) wat op 'n reusagtige mossel lyk. Tydens die somer vind hier talle konserte plaas, terwyl die tradisionele Litause sangfeeste hier elke vier jaar gehou word. Op die militêre begraafplaas oos van die amfiteater is meer as 4 000 hoofsaaklik Duitse soldate ter ruste gelê wat tydens die twee wêreldoorloë in Litaue gesneuwel het.

Verwysings[wysig]

  1. Vytas Stanley Vardys en Judith B. Sedaitis: Lithuania. The Rebel Nation. Boulder, CO: Westview Press 1997

Eksterne skakels[wysig]