Selahattin Demirtaş
| Selahattin Demirtaş | |
.jpg) | |
Voorsitter van die Demokratiese Volksparty
saam met Figen Yüksekdağ | |
| Ampsbekleër | |
| Termynaanvang 22 Junie 2014 | |
| Voorafgegaan deur | Ertuğrul Kürkçü & Sebahat Tuncel |
|---|---|
Leier van die Vrede en Demokrasieparty
| |
| Ampstermyn 1 Februarie 2010 – 22 April 2014 | |
| Voorafgegaan deur | Mustafa Ayzit Demir Çelik |
| Opgevolg deur | Amp afgeskaf |
Lid van die Groot Nasionale Vergadering
| |
| Ampsbekleër | |
| Termynaanvang 22 Julie 2007 | |
Persoonlike besonderhede
| |
| Gebore | 10 April 1973 Palu, Elazığ, Turkye |
| Politieke party | Demokratiese Gemeenskap-party (tot 2008) Party vir Vrede en Demokrasie (2008–2014) Demokratiese Volksparty (2014–hede) |
| Eggenoot/-note | Başak Demirtaş |
| Kind(ers) | Delal en Dılda |
| Alma mater | Universiteit van Ankara |
Selahattin Demirtaş (gebore 10 April 1973) is ’n Zaza- en Koerdiese politikus en saam met Figen Yüksekdağ medeleier van die linksgesinde pro-Koerdiese Demokratiese Volksparty (HDP) in Turkye. Demirtaş was die HDP se presidentskanditaat in die verkiesing van 2014 en het derde gekom met 9,77% van die stemme.
Herkoms en skoolloopbaan
[wysig | wysig bron]Selahattin Demirtaş is in 1973 Elazığ gebore as seun van ’n Zaza-sprekende gesin.[1] Hy het sy primêre sowel as sekondêre skoolopleiding op sy geboortedorp voltooi. Hy noem sy ervaring op die begrafnis van die politikus Vedat Aydin as ’n politieke ontwaking: “Ek het ’n ander mens geword. My lewensrigting het verander ... hoewel ek nie die redes vir die gebeure begryp het nie, het ek geweet: Ons is Koerde, en omdat dit nie ’n identiteit was wat ek sou weggooi nie, was dit ook my probleem.”[2]
Universiteitsopleiding
[wysig | wysig bron]Nadat hy sy skoolloopbaan voltooi het, het hy sy naskoolse opleiding aan die Dokuz Eylül-universiteit begin in die departement van maritieme handel en bestuur. Hier het hy hom politieke probleme op die hals gehaal wat daartoe gelei het dat hy noodgedwonge die instelling moes verlaat. Hy het teruggekeer na Diyarbakır en opnuut die toelastingseksamen afgelê. Hierna skryf hy in aan die Universiteit van Ankara se regsfakulteit. Ná universiteit het Demirtaş as ’n tyd lank as vryskut-prokureur gewerk voor hy lid van die uitvoerende komitee van die Diyarbakır-tak van die Menseregtevereniging (IHD) geword het. Die destydse voorsitter was Osman Baydemir, wat in die daaropvolgende verkiesing burgemeester van Diyarbakır geword het, waarna Demirtaş hom as voorsitter van die plaaslike IHD-tak opgevolg het. Tydens sy termyn as voorsitter het die vereniging hom veral toegespits op die toenemende voorkoms van onopgeloste politieke moorde in Turkye.
Demirtaş was ’n stigterslid van die Turkse Menseregtevereniging (TIHV) en die Diyarbakır-afdeling van Amnestie Internasionaal.
Politieke loopbaan
[wysig | wysig bron]
Demirtaş het sy politieke loopbaan in 2007 as lid van die Demokratiese Gemeenskap-party (DTP) begin toe hy as een van die “Duisend Hoop-kandidate” vir die DTP en talle ander demokratiese organisasies in Turkye gestaan het. Hy is verkies tot die 23ste parlement en het op die ouderdom van 34 die party se hoofbeampte in die parlement geword.
In 2009 is die DTP per hooggeregshofbevel ontbind waarna die DTP-LP’s aangesluit het by die Party vir Vrede en Demokrasie (BDP). Die BDP het sy eerste kongres in 2010 gehou en Demirtaş en Gültan Kışanak tot sy nuwe medevoorsitters verkies. Demirtaş het aan die 2011-verkiesing deelgeneem as deel van die gesamentlike “Arbeid, Demokrasie en Vryheid”-lys wat onderskryf is deur die BDP en 18 verskillende demokratiese politieke organisasies. Hy is herkies tot die 24ste parlement.
Demirtaş was medevoorsitter van die BDP in die tydperk toe die vredesproses en -onderhandelings in Turkey begin het. In 2014 is hy en Figen Yüksekdağ verkies tot medevoorsitters van die Demokratiese Volksparty (HDP), ’n nuwe beweging wat ontstaan het uit die drie jaar lange koalisie van die BDP en talle ander politieke partye en organisasies onder die beskerming van die Demokratiese Volkskongres (HDK). In die presidentsverkiesing van 2014 was Demirtaş een van drie linksgesinde kandidate wat aan die kiesstryd deelgeneem het.[3] Hy het derde gekom met 9,77% van die stemme.
Demirtaş was medeleier saam met Yüksekdağ toe die HDP in Junie 2015 aan sy eerste algemene verkiesing deelneem. Die HDP het die vierde plek behaal met 13,12% van die stemme en so 80 van die 550 setels verower en so maklik die 10%-kiesdrempel oorskry wat nodig is voor 'n party in die parlement verteenwoordig kan word.
Privaat lewe
[wysig | wysig bron]Demirtaş is getroud met Başak Demirtaş en het twee dogters, Delal en Dılda.
Demirtaş kry af en toe dreigemente vanweë sy politieke bedrywighede en het op 22 November 2015 ’n sluipmoordaanval oorleef.[4]
Verwysings
[wysig | wysig bron]- ↑ Orhan Türkdoğan, Doğu ve Güneydoğu: Sorunlar ve Çözüm Yolları, IQ KültürSanat Yayıncılık, 2009, ISBN 9789752552623, bl. 16.
- ↑ Bellaigue, Christopher de. "The battle for Turkey: can Selahattin Demirtas pull the country back from the brink of civil war? | Christopher de Bellaigue". the Guardian. Besoek op 30 Oktober 2015.
- ↑ "Kurdish problem-focused HDP announces co-chair Demirtaş as presidential candidate". 30 Junie 2014. Besoek op 1 Julie 2014.
- ↑ "HDP says co-leader escaped an assassination attempt". 23 November 2015. Besoek op 24 November 2015.
Eksterne skakels
[wysig | wysig bron]
Hierdie artikel is vertaal uit die Engelse Wikipedia
