Abraham Kruger

Abraham Kruger.

Abraham Kruger (plaas Olievenhoutfontein, distrik Burgersdorp, Kaapkolonie, 25 Februarie 1880 – onbekend) was ’n boer op die plaas Damplaats, omgewing Knapdaar, distrik Burgersdorp, politikus en kultuurleier.

Kruger se ouers was Johannes Abraham en Maria Elizabeth Kruger, née Coetsee. Sy oorgrootvader was 'n neef van pres. Paul Kruger en het deelgeneem aan die opstand van Slagtersnek. Sy plaas Krugerspoort was op Slagtersnek. Hierdie Kruger-voorsaat het na die Suurberge gevlug; daarom is hy nie gevang nie.

Abraham Kruger het in 1896 lid geword van die Afrikanerbond en is in 1902 gekies as sekretaris en lid van die distriksbestuur. In 1904 het sy begaafdheid as politikus aktief op die voorgrond begin kom; hy is toe gekies as voorsitter van die Bond en het onafgebroke gedien tot 1912. Daarna was hy tot in 1914 voorsitter van die Suid-Afrikaanse Party. Met die stigting van die Nasionale Party was hy 'n Hertzog-man en was saam met L.J. Steytler, later Volksraadslid, by die konferensie op De Aar. Hy het gedien as voorsitter van die distriksbestuur. Hy was meermale afgevaardigde na die Bonds- en later Nasionale Party-kongresse. In 1923 was hy op die Nasionale Party se kongres in Oos-Londen saamroeper van die Kommissie in sake Art. 4 van die Nasionale Programma, die twisappel van die Party.

Hy was jare lank ouderling van die Gereformeerde Kerk. In die Afdelingsraad het hy uitstekende werk verrig. Gedurende die tyd dat hy in die raad gedien het, het hy meer geld vir sy wyk gekry as al sy voorgangers tesame. Hy was lid van die skoolkommissie en van die skoolraad en het groot belanggestel in dié werk. Vanaf 1925 was hy lid van die hoofbestuur van die Helpmekaar. In 1929 is hy gekies as lid van die hoofbestuur van die Calvinistiese Bond en in 1930 het hy in die uitvoerende raad daarvan gedien.

In Desember 1929 is hy tydens die stigtingskongres in Bloemfontein gekies op die hoofbestuur van die FAK. Hy was ook een van die provinsiale leier van die FAK in Kaapland. Danksy sy betrokkenheid by die Calvinistiese Bond en FAK is hy beskryf as kultuurdraer en handhawerr. Hy het die kiesafdeling takke van die FAK gestig en g'n onkoste of ongerief was vir hom te groot nie.

Kruger se stokperdjies was om ’n groot studie van die hemelliggame en ander wetenskaplike onderwerpe te maak. Hiervan was sy goed gevulde boekrakke 'n bewys.

Gesinslewe

Kruger is op 25 September 1905 met Annie Venter getroud. Hulle het sewe kinders gehad van wie twee gesterf het toe hulle nog klein was.

Bron

• (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy.