Afriqiyah Lugdiens Vlug 771

in Wikipedia, die vrye ensiklopedie
Jump to navigation Jump to search
Afriqiyah Lugdiens Vlug 771
Datum: 12 Mei 2010
Oorsaak: Ruimtelike disoriëntasie en
verkeerd-uitgevoerde landing.
Plek van ramp: Tripoli Internasionale Lughawe
Sterftes: 103
Beserings: 1
Vliegtuig Tipe: Airbus A330-200
Vliegtuig Stertnommer: 5A-ONG
Oorsprong: O.R. Tambo Internasionale Lughawe, Johannesburg, Suid-Afrika
Bestemming: Tripoli Internasionale Lughawe, Tripoli, Libië
Passasiers: 93
Bemanning: 11
Oorlewendes: 1

Afriqiyah Lugdiens Vlug 771 was 'n geskeduleerde internasionale vlug wat op 12 Mei 2010 om 06:10 plaaslike tyd neergestort het terwyl dit die aanloopbaan van die Tripoli Internasionale Lughawe genader het. Die enigste oorlewende is 'n 9-jarige Nederlandse seun, Ruben van Assouw.[1] 103 mense het egter hul lewe in die ramp verloor.

Die vliegtuig[wysig | wysig bron]

Die verongelukte vliegtuig op die Doebai Internasionale Lughawe in November 2009

Die vliegtuig was 'n Airbus A330-200 met registrasie 5A-ONG. Afriqiyah Lugdiens het die vliegtuig in September 2009 bekom en het ten tyde van die ongeluk ongeveer 1 600 vlugure en 420 vlugte gehad. Die vliegtuig het van General Electric CF6-80E1-enjins gebruik gemaak. Die vliegtuig is ontwerp om 253 passasiers te vervoer. Op die dag van die ongeluk was daar 93 passasiers en 11 bemanningslede aan boord waarvan die meeste afkomstig was van Nederland, Libië en Suid-Afrika.

Vlug[wysig | wysig bron]

Die roete van Vlug 771

Die vlug se oorsprong was by die O.R. Tambo Internasionale Lughawe en was geskeduleer om by sy finale bestemming, Tripoli Internasionale Lughawe te land. Die vliegtuig het egter ongeveer 900 meter kort van aanloopbaan 09 neergestort. Geen brand is na nie ongeluk aangemeld nie. Daar is oorspronklik gerapporteer dat die ongeluk slegs een meter kort van die aanloopbaan plaasgevind het. Die METAR wat die dag in gebruik was, was HLLT 120350Z VRB01KT 6000 NSC 19/17 Q1008[A]. Sekuriteitsbeamptes het gemeld dat die vliegtuig ontplof het voordat dit gedisintegreer het. Die Libiese Minister van Vervoer het terrorisme as oorsaak van die ongeluk uitgesluit.

Dit was die eerste ongeluk waarby Afriqiyah Lugdiens betrokke was sedert hul ontstaan in April 2001.

Ondersoek[wysig | wysig bron]

Die Libiese Burgerlugvaartowerheid het 'n amptelike ondersoek na die ongeluk gelas. Airbus het gemeld dat hy volle tegniese ondersteuning aan die owerhede sal bied wat die ongeluk ondersoek. Die Suid-Afrikaanse Burgerlugvaartowerheid het ook 'n span gestuur om te help met die ondersoek. Die Franse Bureau d'Enquêtes et d'Analyses pour la Sécurité de l'Aviation Civile (BEA) het ook hul hulp aangebied en het 'n span van twee ondersoekers na die toneel ontbied.

Die vlugopnemers is gevind deeglik ontleed.

Reaksie[wysig | wysig bron]

  • Vlag van Libië Afriqiyah Lugdiens het 'n verklaring uitgereik wat gemeld het dat die naasbestaandes van die slagoffers, wat Libië wil besoek, se vervoer en verblyfkostes deur die lugdiens gedek sal word. Die Libiese owerhede het gemeld dat sekere paspoortbeperkings opgehef sal word en verseker dat visums uitgereik sal word.[2]
  • Vlag van Nederland Koningin Beatrix van Nederland het haar skok uitgespreek toe sy die nuus hoor.[3]
  • Vlag van Suid-Afrika President Jacob Zuma het ook sy meegevoel betoon tydens 'n parlementsitting.[4]

Passasiers en bemanningslede[wysig | wysig bron]

Die lugredery het 'n lys van die nasionaliteite van die slagoffers uitgereik. Al elf bemanningslede was Libiërs gewees. Verskeie passasiers het ook dubbele burgerskap gehou.

Nasionaliteit Oorlede Oorlewendes Totaal
Passasiers Bemanningslede
Vlag van Nederland Nederland 67 1 68
Vlag van Libië Libië 2 11 12
Vlag van Suid-Afrika Suid-Afrika 13 13*
Vlag van België België 4 4
Vlag van Oostenryk Oostenryk 2 2
Vlag van Verenigde Koninkryk Verenigde Koninkryk 1 1
Vlag van Frankryk Frankryk 1 1
Vlag van Filippyne Filippyne 1 1
Vlag van Duitsland Duitsland 1 1
Vlag van Zimbabwe Zimbabwe 1 1
Totaal 92 11 1 103

* 1 Suid-Afrikaanse paspoorthouer, Bree O'Mara het Suid-Afrikaanse sowel as Ierse burgerskap gehad.[5]

Mohamed Zidan, die Libiese Minister van Vervoer het gerapporteer dat die enigste oorlewende van die ramp 'n seun van Nederland is. Die seun is later as die negejarige Ruben van Assouw geïdentifiseer. Hy is woonagtig in die stad Tilburg en het so pas saam met sy familie teruggekeer van 'n safari in Suid-Afrika. Sy ouers en broer was ook op die vlug. Hulle het die seun in sy sitplek gevind, steeds vasgegordel, ongeveer 400 meter van die plek waar die vliegtuig geval het. Toe hulle die seun vind, was hy heeltemal naak.[6] Sy pa is die eiernaar van UnIT Services in die Eindhoven-area. Van Assouw is na die Sabia'a-hospitaal, 30 kilometer suid-oos van Tripoli, geneem en is later na die Al-Khadhra-hospitaal in Tripoli oorgeplaas, waar hy 'n operasie ondergaan het vir sy veelvuldige frakture aan beide bene. Die segspersoon van Nederland se Departement van Buitelandse Sake, Ad Meijer, het gemeld dat die kind geen lewensbedreigende beserings opgedoen het nie. Saif al-Islam Muammar Al-Gaddafi en Kaptein Sabri Shadi, die hoof van Afriqiyah Lugdiens, het Van Assouw in die hospitaal besoek. Op 15 Mei is hy per lugambulans na Eindhoven in Nederland vervoer. Sy oom en tante het hom vergesel.

Van die passasiers, sou 42 verder vertrek het na Düsseldorf, 32 na Brussel, sewe na Londen, en een na Parys. Elf passasiers se finale bestemming was Libië.

Onder die slagoffers was Frans Dreyer, broer van Anchen Dreyer wat 'n parlementslid is en sy vriend en kollega, Anton Matthee. Een van die Nederlandse slagoffers was Joëlle van Noppen, sanger van die voormalige Nederlandse groep WOW!

Die vlugdeklede is geïdentifiseer as Kaptein Yousef Bashir Al-Saadi (Arabies: يوسف بشير الساعدي‎), Mede-vlieënier Tareq Mousa Abu Al-Chaouachi (Arabies: طارق موسي أبو الشواشي‎), en Mede-vlieënier Nazim Al-Mabruk Al-Tarhuni (Arabies: ناظم المبروك الترهوني‎).

Nota[wysig | wysig bron]

'n ^ Vertaling: METAR vir Tripoli Internasionale Lughawe, uitgereik om 03:50 UTC op 12 Mei 2010. Windrigting veranderlik met 'n spoed van 1 knoop (1,9 km/h), sigbaarheid 6 000 meter (3,7 myl), geen beduidende wolkbedekking, temperatuur 19 °C, doupunt 17°C, altimeter instelling van 1008 hPa.

Verwysings[wysig | wysig bron]

  1. (nl) Overlevende vliegramp is Tilburgs jongetje”. Brabants Dagblad. URL besoek op 14 Mei 2010.
  2. (en) Afriqiyah Flight 771 crash release 3 11:00 UTC”. Afriqiyah Airways. URL besoek op 25 Augustus 2010.
  3. (nl) 61 Nederlanders dood bij vliegtuigcrash Libië”. NRC Handelsblad. URL besoek op 25 Mei 2010.
  4. (en) Plane crash in Libya 'kills more than 100 on board'”. BBC News: 12 Mei 2010. URL besoek op 12 Mei 2010.
  5. (en) 103 dead in Libyan plane crash”. RTÉ News and Current Affairs: 12 Mei 2010. URL besoek op 17 Mei 2010.
  6. (nl) http://www.nu.nl/vliegramp-tripoli/2247004/ruben-wordt-uitstekend-verzorgd.html

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Engelse Wikipedia vertaal.