Algoabaai-stormramp van 1902

Die Algoabaai-stormramp van 1902 was die mees verwoestende katastrofe wat die skeepvaart in Suider-Afrika ooit ervaar het.

Algoabaai het toe nog geen hawe gehad nie en op Sondag 31 Augustus het daar 38 skepe aan hul ankers in die baai gelê. Hulle het gevaar onder die vlae van o.a. Swede, Italië, Duitsland, Brittanje en Noorweë en het gewag om goedere soos suiker, jarrahout, dwarslêers, koring, koffie en meel afkomstig van plekke soos Mauritius, Buenos Aires, Rio de Janeiro, Adelaide (Australië), Melbourne, Londen en Portland, VSA in die Kaapkolonie aan wal te bring.

Daardie aand was dit sterk bewolk, dit het boonop swaar gereën en die suidoosterstorm het in felheid toegeneem tot een van die kwaaiste orkane van alle tye wat reuse golwe en branders tot gevolg gehad het. Teen middernag het die ankerketting van die Britse skoener Gabrielle gebreek en het die skip by Noordeinde gestrand. Hierna beland so baie ander skepe in die moeilikheid deurdat hul ankers sleep of die ankerkettings breek dat die reddingsdienste nie meer op alle noodseine kon reageer nie. Op 1 September was die hele strandgebied van Noordeinde ‘n toneel van verwoesting. Op ‘n stuk strand van slegs 1½ km het 20 skeepswrakke gelê. Die volgende dae het nog lyke en vrag uitgespoel. Teen Dinsdag het die storm bedaar. Onder die 59 sterfgevalle was ook ‘n aantal reddingswerkers. In totaal is 21 groter skepe en 11 ligters sowel as tonne kosbare vrag verloor. Na hierdie ramp is daadwerklike pogings aangewend om ‘n hawe vir Port Elizabeth te ontwikkel.

In die begraafplaas van Suideinde is daar ‘n monument wat hierdie gebeurtenis in herinnering roep.

Lees ook

• Grootste rampe in Suid-Afrika

Bibliografie

• Burman, Jose: Great Shipwrecks off the Coast of Southern Africa. Kaapstad: Struik. 1967
• Turner, Malcolm: Shipwrecks & Salvage in South Africa – 1505 to the present. Kaapstad: Struik, 1988. ISBN 0-86977-387-9