Bakeriet

Bakeriet
Bakeriet in 'n mineraalversameling van die Bringham Young Universiteit se Departement Geologie, Provo, Utah.
Nickel-Strunz (10)	9.AJ.20
Kleur	kleurloos, wit
Glans	glasagtig, dof
Hardheid	4,5
Digtheid	2,88 g/cm3
Dubbelbreking	tweeassig (-)
Ruimtegroep	P2₁/c
Eenheidsel	a=4,850(2) Å; b=7,627(4) Å; c=9,659(5) Å; 90,255(8)°
* Lys van minerale
Portaal Geologie

Bakeriet is die algemene naam wat gegee word aan gehidreerde kalsiumboorsilikaathidroksied, 'n borosilikaatmineraal met chemiese formule Ca₄B₄(BO₄)(SiO₄)₃(OH)₃·(H₂O) wat voorkom in vulkaniese gesteentes in die Baker-area in Kalifornië.

Geskiedenis

Dit is die eerste keer in 1903 beskryf waar dit voorkom in die Corkscrew Canyonmyn van die Black Mountains, Death Valley Nasionale Park, Kalifornië, VSA. Dit is vernoem na Richard C. Baker, 'n direkteur van die Pacific Coast Borax Company.

Kristalstruktuur

Bakeriet (Ca₄B₅Si₃O₁₅(OH)₅) se struktuur is nouverwant aan datoliet s'n (Ca₄B₄Si₄O₁₆(OH)₈), maar daar is geen minerale gevind wat op 'n oplossingsreeks wys nie.

Bakeriet besit 'n gelaagde struktuur. Daar is kalsiumlae wat afwissel met lae wat 'n netwerk van twee tipes tetraëders bevat. Die kalsiumatome het 'n koördinasie wat as 'n vervormde tetragonale antiprisma beskryf kan word. Die hidroksielgroepe wys na die kalsiumatome. Die eerste tipe tetraëder is T₁ = Si_¾B_¼O_3¼(OH)_¼; die ander een T₂ = BO₃(OH). Die tetraëders is aan hoekpunte met mekaar verbind en vorm 'n 2D-netwerk.

DTA-eksperimente het uitgewys dat die mineraal sy hidroksielgroepe stapsgewys by 652 °C en 703 °C verloor, pleks van in een stap by 733 °C soos met datoliet.