Biefstuk

in Wikipedia, die vrye ensiklopedie
Jump to navigation Jump to search
'n Stuk kruisskyf lê op die braaier.

Biefstuk word as 'n spesiale snit van beesvleis beskou, en word uit die agterkwart se rugstring of die boonste deel van die boud van 'n jong bees gesny. Dié snit is 'n lekkerny op enige spyskaart, omrede die vleis van hierdie deel baie sagter en smaakliker is as byvoorbeeld snitte uit die voorkwart, nek of bene, wat meer vir potkook gebruik word.

Dit word dikwels ook steak genoem, hoewel dié term vir die vleis van ander diere soos vark, volstruis, seekat, wild, perde, bokke, kangaroes[1][2] en haaie gebruik kan word.

Die meeste mense vind biefstuk heerlik en is bereid om meer daarvoor te betaal by hulle slagter as vir ander swakker snitte van die bees. Dit word in Suid-Afrika dikwels oor ’n braaivleisvuur gebraai,[3] of andersins in ’n pan. Dit kan ook in ’n geurige sous gekook word as ’n kasserol of bredie of in ’n potjie,[4][5] of as maalvleis in geregte soos bobotie, lasagne, frikkadelle en hamburgers.

Gaarmaak[wysig | wysig bron]

London broil is ’n Noord-Amerikaanse gereg wat van biefstuk gemaak word en in repies gesny word.

Biefstuk word gewoonlik gebraai of gerooster. Dit kan by verskillende temperature of vir verskillende tye gaargemaak word vir steaks wat van "rou" tot "baie gaar" wissel. Die mees algemene kenmerk van ’n rou steak is dat dit in die middel sag, koel en rooi is, met die buitekant wat bruin geskroei is. Steaks wat goed gaar is, is regdeur bruin. Biefstuk kan ook rou voorgesit word, soos in ’n Tartaarse steak.

Van die verskillende snitte biefstuk wat verkrygbaar is, is riboogsteak, lendeskyf, beeshaas, kruisskyf, bolendeskyf en T-beenskyf.[6] Snitte verskil egter van land tot land omdat die karkas op verskillende maniere opgesny word. ’n Steak in een land is dus nie noodwendig dieselfde as in ’n ander land nie, al is die resep dalk dieselfde.[7]

Die eet van biefstuk[wysig | wysig bron]

Steak is ’n gewilde gereg in baie dele van die wêreld en word in restaurante sowel as tuis gaargemaak. Dit is dikwels die hoofitem op ’n spyskaart. Dit word soms in klein hoeveelhede in ’n voorgereg gebruik, maar meer dikwels in ’n groter hoeveelheid as ’n hoofgereg. Dit is ook dikwels ’n gewilde gereg vir ontbyt, veral vir mense wat hard buite werk, soos boere.[8]

’n Steakrestaurant (Engels: steakhouse) is ’n restaurant wat spesialiseer in biefstuk en ander individuele porsies vleis. Mense wat in ’n restaurant eet, vertel gewoonlik vir die kelner hoe hulle hul steak gaargemaak wil hê en gebruik terme soos "rou", "mediumgaar tot rou", "mediumgaar", "medium- tot goed gaar" en "goed gaar".

’n Steakmes is ’n mes wat spesiaal ontwerp is om steak mee te eet; dit is skerper as ander messe en het ’n getande snykant.

Souse en smaakmiddels[wysig | wysig bron]

Steak au poivre, berei met filet mignon en ’n peperkorrelsous.

Klassieke souse en smaakmiddels by biefstuk sluit in:

  • Béarnaise-sous
  • Café de Paris-sous
  • Peper- of peperkorrelsous
  • Kaassous
  • Botters soos pietersielie-, knoffel- of slakbotter
  • Demi-glace, ’n ryk bruin sous vir Franse geregte
  • Mosterd
  • Vars roosmaryn
  • Sout en peper
  • Sous Nivernaise
  • Witwynsous
  • Pangebraaide sampioene[9]
  • Worcestersous

Kommersieel vervaardigde, gebottelde souse met voorafgemengde speserye is ook gewild.

Verwysings[wysig | wysig bron]

  1. Exotic Meats USA - Kangaroo”. Besoek op 23 Desember 2014
  2. Eating Skippy: Why Australia has a problem with kangaroo meat”. BBC News. Besoek op 23 Desember 2014
  3. Jan Braai, Eat Out, 8 Oktober 2012. Jan Braai on how to braai the perfect steak. Besoek op 15 Desember 2018
  4. Steak en stout potjie by Beef Talk. Besoek op 15 Desember 2018
  5. Beef and beer potjie by Potjiekos World. Besoek op 15 Desember 2018
  6. Steak Cooking Times”. URL besoek op 8 November 2015.
  7. Beck, Simone; Bertholle, Louisette; Child, Julia (1961). Mastering the Art of French Cooking. Middlesex, England: Penguin Books. pp. 315–317. 
  8. O'Conner, Elizabeth (1958). Steak for breakfast. Sydney, NSW: Angus & Robertson. 
  9. Tramonto, R.; Goodbody, M.; Fink, B. (2010). Steak with Friends: At Home, with Rick Tramonto. Andrews McMeel Publishing. p. 244. ISBN 978-0-7407-9257-1. 
Hierdie artikel is in sy geheel of gedeeltelik vanuit die Engelse Wikipedia vertaal.