Brigham Young-universiteit

in Wikipedia, die vrye ensiklopedie
Jump to navigation Jump to search
Brigham Young-universiteit
Brigham Young University
Brigham Young University medallion.svg
Wapen van die Brigham Young-universiteit

Leuse:Geen
Gestig:16 Oktober 1875
Tipe:Privaat universiteit
Godsdienstige Affiliasie:Kerk van Jesus Christus van die Heiliges van die Laaste Dae
Befondsing:$1,72 miljard (2017)
President:Kevin J Worthen
Voorgraadse studente:30 745
Nagraadse studente:2 766
Ligging:Provo, Utah, Verenigde State
40°14′59″N 111°38′57″W / 40.24972°N 111.64917°W / 40.24972; -111.64917Koördinate: 40°14′59″N 111°38′57″W / 40.24972°N 111.64917°W / 40.24972; -111.64917
Kampus:Voorstedelik (2,3 km² of 560 akkers)
Sport:21 universiteitsspanne
Kleure:Vlootblou • wit • koningsblou
              
Bynaam:Cougars
Gelukbringer:Cosmo the Cougar
Affiliasies:NCAA Division I - FBS (Independent), West Coast Conference
Webtuiste:byu.edu

Die Brigham Young-universiteit (Engels: Brigham Young University, kortweg BYU, of The Y in die omgangstaal) is 'n privaat navorsingsuniversiteit in Provo in die Amerikaanse deelstaat Utah. Die universiteit is gestig deur en in besit van die Kerk van Jesus Christus van die Heiliges van die Laaste Dae en maak deel uit van die Kerk se eie onderwysstelsel, die Church Education System (CES). BYU is sedert die laat 1960's die grootste Christelike tersiêre onderwysinstelling sowel as een van die grootste privaat universiteite in die Verenigde State.[1][2] Die universiteit se begroting word grotendeels deur die Kerk befonds en sodoende deur die Kerk se tiendeheffing gefinansieer. Studentegelde is betreklik laer as in ander onderwysinstellings (waarby studente, wat nie Kerklidmate is nie, hoër bydraes betaal).

Die BYU-kampus met die bergpieke Y Mountain en Squaw Peak teen die agtergrond
Die BYU-kampus, met die varswatermeer Utahmeer teen die agtergrond
BYU se uitsaaisentrum. Die universiteit saai radio- en televisieprogramme uit
Die Provo-opleidingsentrum vir sendelinge. Jong dames en here, wat sendingwerk in die buiteland doen, leer hier onder meer die taal aan wat vir hul buitelandse sendings benodig word. Baie van hulle volg daarna 'n akademiese opleiding aan die BYU
Die BYU Departement van Fisika en Astronomie se spesiale Mars Rover-voertuig vir die verkenning van die Rooi Planeet word by die Mars Desert Research Station in Hanksville, Suid-Utah getoets

Meer as 90 persent van die studente is Kerklidmate. BYU staan nogtans oop vir studente wat ander gelowe aanhang sowel as ongebonde studente. Van studente word verwag om aan die universiteit se hoë standaarde vir persoonlike voorkoms en gepaste kleredrag te voldoen. BYU-studente is afkomstig uit alle vyftig Amerikaanse deelstate (95 persent van die studente) en 103 lande (vyf persent). Danksy die Kerk se uitgebreide sendingwerk het BYU 'n groter persentasie studente wat vreemde tale magtig is en ervaring opgedoen het tydens langer verblywe oorsee. BYU skenk groot aandag aan onderwys in vreemde tale.

BYU het 33 633 dagstudente (van wie 30 745 voorgraadse en 2 766 nagraadse studente - met 'n eweredige getalleverhouding tussen mans en vroue). Die getal voorgraadse studente is die grootste van alle privaat tersiêre instellings in die VSA.[3] Sowat dertig persent van Provo se stadsbevolking is BYU-studente.

Buite Provo het BYU kampusse in Salt Lake City (LDS Business College), Idaho en Hawaii. Die Polynesian Cultural Center, wat op die kampus van BYU Hawaii geleë is, is in besit van die Kerk van Jesus Christus van die Heiliges van die Laaste Dae. Die sentrum het sy historiese oorsprong in sendingwerk wat deur die Kerk reeds in die 1840's op die Hawaii-eilande begin is.[4] Personeellede is meestal studente op die nabygeleë BYU-kampus vir wie optredes in die sentrum ´n ekstra bron van inkomste is, terwyl die sentrum se inkomste vir die Kerk se opvoedingsprogram aangewend word. In Jerusalem is die Brigham Young University Center Jerusalem for Near Eastern Studies gevestig.

Verwysings[wysig | wysig bron]

  1. Allan Kent Powell: The Utah Guide. Third edition. Golden, CO: Fulcrum Publishing 2003, bl. 125
  2. J.B. (John Ben) Haws: The Mormon Image in the American Mind. Fifty Years of Public Perception. New York, NY: Oxford University Press 2013, bl. 48
  3. www.byu.edu: About. Besoek op 30 Julie 2020
  4. Polynesia.com: Purpose and History of Polynesian Cultural Center. Besoek op 9 Augustus 2020

Eksterne skakels[wysig | wysig bron]

Amptelike Instagram-rekening van BYU

Undergraduate Catalog 2019-2020

BYU Mars Rover

Media

Suid-Afrikaanse oud-studente van BYU