Carnegie Hall

in Wikipedia, die vrye ensiklopedie
Carnegie Hall se hoofingang

Carnegie Hall is ’n groot konsertsaal in New York waarin talle beroemde musici al opgetree het. Die konsertsaal is in 1890 deur die Skotse nyweraar en filantroop Andrew Carnegie gebou. Dit is een van die mees vooraanstaande en prestigeryke sale vir sowel klassieke as populêre musiek in die Verenigde State van Amerika. Om op dié verhoog te verskyn, word as 'n groot eer en prestasie beskou.[1]

Die gebou se planne is deur die bekende New Yorkse argitek William Burnet Tuthill (1855–1929) opgetrek, wat self 'n amateur-tjellis en vader van die komponis Burnet Tuthill was. Die plek is nie net bekend vir sy argitektuur en geskiedenis nie, maar ook vir sy akoestiek. Die nagalm-tyd (vir eggo's) beloop 1,80 sekondes met publiek, sonder publiek 2,10 sekondes. Die saal word vir optredes aan groepe en kunstenaars verhuur.

Isaac Stern-ouditorium[wysig | wysig bron]

Die Isaac Stern-ouditorium

Die hoofsaal, die Isaac Stern-ouditorium, bied sitplek aan 2840 toeskouers op vyf vlakke. Dit is na die violis Isaac Stern genoem. Die saal is lank en besoekers moet 105 stappe klim om by die boonste balkon uit te kom.

Die wêreldberoemde New Yorkse Filharmoniese Orkes het vir jare hulle konserte hier aangebied. In 1962 het hulle na 'n nuwe konsertsaal in die Lincoln-sentrum verhuis. Talle van die grootste klassieke kunstenaars het al in die ouditorium opgetree. Dit word steeds vir konserte aangewend, vir beide klassieke en populêre musiek.

Zankel-saal[wysig | wysig bron]

Die saal bied sitplek vir 599 toeskouers. Dit is na Judy en Arthur Zankel genoem. Dit het aanvanklik die Voordragsaal (Recital Hall) geheet, maar is in 1896 na Carnegie Lyceum vernoem. Dit is vanaf 1898 deur die Amerikaanse Akademie vir Dramatiese Kunste gebruik. In 1959 is dit in 'n kinema verander. Vanaf 1997 is dit vir voordragte ingespan.

Weill Recital-saal[wysig | wysig bron]

Die Weill Recital-saal is 'n klein konsertsaal met 268 sitplekke. Dit is in 1986 na Sanford I. Weill en sy vrou Joan vernoem. Weill was 'n voormalige voorsitter van Carnegie Hall se direksie.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8

Eksterne skakels[wysig | wysig bron]

Koördinate: 40°45′54″N 73°58′48″W / 40.76500°N 73.98000°W / 40.76500; -73.98000