Cass Elliot

in Wikipedia, die vrye ensiklopedie
Cass Elliot
Cass Elliot in 1972
Agtergrondinligting
GeboortenaamEllen Naomi Cohen
Gebore19 September 1941
Baltimore, Maryland, VSA
Sterf29 Julie 1974
Londen, Engeland, Verenigde Koninkryk
GenresPopmusiek
Folk rock
Beroep(e)Sangeres
InstrumenteStem
Jare aktief1959 tot 1974
EtiketteFM
Dunhill
RCA
AssosiasiesThe Mamas & the Papas
Webwerfcasselliot.com
The Mamas & Papas tree in 1968 in die Ed Sullivan Show op - met Cass Elliot tweede van links

Cass Elliot (gebore as Ellen Naomi Cohen; * 19 September 1941, † 29 Julie 1974), ook bekend as Mama Cass, was 'n Amerikaanse sangeres en lid van die popgroep The Mamas & the Papas. Ná die ontbinding van dié groep het Elliot vyf soloalbums vrygestel. In 1974 is Elliot op die hoogtepunt van haar loopbaan, toe sy 'n konserttoer in die Verenigde Koninkryk onderneem en onder meer in die London Palladium opgetree het, in die woonstel van haar vriend, die Amerikaanse sanger Harry Nilsson (1941–1994), in Mayfair, Londen, waar sy tydens die toer gebly het, skielik in haar slaap aan 'n hartaanval oorlede.

Reeds kort ná haar afsterwe het onware gerugte die rondte gedoen dat sy aan 'n toebroodjie verstik het. Tydens die nadoodse ondersoek, wat deur Keith Simpson, een van die Verenigde Koninkryk se voorste forensiese patoloë op daardie tydstip, en die Londense lykskouer Dr Gavin Thurston gedoen is, is geen onverteerde kos in haar maag gevind nie.[1] Cass Elliot het haar laaste rusplek op die Mount Sinai-begraafplaas in Hollywood Hills, Los Angeles gevind.

In 1998 is Elliot postuum saam met die drie ander groeplede van The Mamas & the Papas - John Phillips, Denny Doherty en Michelle Phillips - in die Rock and Roll Hall of Fame opgeneem.[2] Die Hollywoodse Kamer van Koophandel se Walk of Fame-keurkomitee het op 22 Junie 2015 bekendgemaak dat Cass Elliot as deel van die Klas van 2016 postuum met 'n ster op die Hollywood Walk of Fame vereer sal word.[3] Cass Elliot se amptelike webtuiste word onderhou deur haar dogter Owen Elliot-Kugell.

Cass Elliot is een van honderde musikale kunstenaars wie se bandopnames in die groot brandramp op 1 Junie 2008 in die Universal Music-ateljees in Universal City, Kalifornië verlore gegaan het.[4]

Biografie[wysig | wysig bron]

Vroeë lewe[wysig | wysig bron]

Cass Elliot is in Baltimore, Maryland as dogter van Philip Cohen († 1962), eienaar van 'n klein besigheid, en Bess Levine (1915–1994), 'n opgeleide verpleegster, gebore.[5] Haar ouers is as kinders van Joodse immigrante gebore wat hulle tydens die groot emigrasiegolf uit die Russiese Tsareryk vanaf 1881 in die Verenigde State gevestig het.[6]

Verwysings[wysig | wysig bron]

  1. medicalbag.com, 11 Maart 2013: Mama Cass Elliot. Besoek op 8 Junie 2020
  2. Rockhall.com
  3. www.casselliot.com: News. Besoek op 14 Junie 2016
  4. The New York Times Magazine, 25 Junie 2019: Here Are Hundreds More Artists Whose Tapes Were Destroyed in the UMG Fire. Besoek op 8 Junie 2020
  5. "Fred Rasmussen: Bess Cohen, was mother of Mama Cass. In: The Baltimore Sun, 2 April 1994". Geargiveer vanaf die oorspronklike op 8 Desember 2015. Besoek op 14 Junie 2016.
  6. Haaretz.com: This Day in Jewish History - Singer Cass Elliot Dies

Eksterne skakels[wysig | wysig bron]

Media