Compton Herbarium

in Wikipedia, die vrye ensiklopedie
Jump to navigation Jump to search
Erica junonia in die Compton Herbarium
Gardenia thunbergia in die Compton Herbarium
Disa purpurascens in die Compton Herbarium

Die Compton Herbarium is 'n herbarium aan die bopunt van die kanferlaan in Kirstenbosch, Suid-Afrika. Dit is op een na die grootste herbarium in suidelike Afrika.

Doel[wysig | wysig bron]

Hierdie herbarium is 'n navorsingsinstelling en dokumenteer en identifiseer hoofsaaklik die plantverskeidenheid van die winterreënvalstreek. Ongeveer 'n 250 000 gedroogde plante word hier bewaar. Navorsing word deur plaaslike en buitelandse plantkundiges onderneem veral oor proteas, ericas, amarillas en orgideë. Ook word hulp verleen aan o.a. natuurbewaarders, bosbouers, insektekundiges en fabrikante van plaagdoders en kunsmisstowwe. 'n Groot biblioteek met boeke oor die plantkunde is hier vir navorsers beskikbaar.

Geskiedenis[wysig | wysig bron]

Die Compton Herbarium is gestig nadat die Bolus Herbarium van Kirstenbosch na die kampus van die Universiteit van Kaapstad verskuif is. Prof. Robert Harold Compton, die tweede direkteur van Kirstenbosch, het vanaf 1937 'n klein herbarium in sy kantoor gehad. In 1940 is dit verskuif na die lokale wat die Bolus Herbarium vakant gelaat het. Later is die Suid-Afrikaanse Museum Herbarium en die Staatsherbarium Stellenbosch ook hierheen oorgeplaas. Sedert 1996 word dit in 'n nuwe moderne navorsingskompleks gehuisves.

Suid-Afrikaanse Museum Herbarium[wysig | wysig bron]

Hierdie herbarium bevat baie waardevolle plante van oor die hele wêreld heen, is die oudste herbarium in die land en van die oudstes in die suidelike halfrond. In 1825 het die Duitse botanikus C.F. Ecklon 325 spesies na die museum gebring. Dr. K.W.L. Pappe kom in 1855 in beheer van die versameling en word in 1858 as koloniale botanikus aangestel. Pappe het egter ook in sy privaat hoedanigheid 'n herbarium opgebou en die herbarium van Karl Zeyher aangekoop. Na Pappe se dood koop die koloniale owerheid die Pappe- en Zeyher-versamelings aan. Vanaf November 1956 word die drie herbaria by Kirstenbosch saam met die Compton Herbarium gehuisves, maar dit bly as 'n aparte eenheid bestaan. Eers in 1988 het dit die eiendom van die Nasionale Botaniese Instituut geword.

Staatsherbarium Stellenbosch[wysig | wysig bron]

Hierdie herbarium is in 1902 deur dr. Ave Duthie gestig. In 1960 is dit deur die Universiteit van Stellenbosch aan die staat oorgedra en sedertdien onder hierdie naam bekend. In 1996 is dit na Kirstenbosch verskuif en met die Compton Herbarium saamgesmelt.

Bibliografie[wysig | wysig bron]