Gaan na inhoud

Cutty Sark

Koördinate: 51°28′58″N 0°0′35″W / 51.48278°N 0.00972°W / 51.48278; -0.00972
in Wikipedia, die vrye ensiklopedie
Die skip se droogdok
Cutty Sark het restourasiewerk ondergaan en word as museumskip drie meter bo die grond op 'n droogdok vertoon
Die Cutty Sark se gerestoureerde agterboeg en roer in die besoekersentrum

Die Cutty Sark was een van die laaste groot teeklippers wat in 1869 in Skotland vir die Willis & Sons-redery gebou is om Chinese tee van die nuutste seisoen binne die kortste tyd na Engeland te vervoer.[1] Sy het bekendheid verwerf vir die wedywering met die Thermopylae, om in die jaarlikse wedvaart van rederye éérste uit China terug in Londen te kom met 'n vrag tee. Cutty Sark het danksy sy die gesofistikeerde vorm van haar romp en haar groot seiloppervlakte 'n topspoed van meer as 17 knope bereik.

Teen die 1870's het die einde aangebreek vir seilskepe, aangesien stoombote hul rol oorgeneem het. Vanaf dié tyd het die Cutty Sark wol tussen Londen en Australië vervoer. Sy het die afstand in 'n tyd van 69 dae afgelê en alle daaropvolgende reise op één na binne 75 tot 80 dae voltooi. Die ander groot klipper, die Thermopylae, kon dit maar één keer in dieselfde tyd doen.

Later het die Cutty Sark bekend geword as 'n handelsnaam vir whisky en diverse seilkompetisies wat na haar vernoem is. In 1938 het die skip sy laaste vaart onderneem om daarna vir goed na Londen terug te keer.

As die enigste oorblywende teeklipper ter wêreld is die Cutty Sark, wat tydens haar dienslewe by feitlik alle groot seehawens aangedoen het, tans aangemeer op 'n droogdok aan die Teemsoewer, nie ver van die Nasionale Seevaartmuseum in Greenwich nie. Dit is op 21 Mei 2007 byna totaal in 'n brand verwoes tydens 'n opknapping. Ná 'n restourasie is dit op 25 April 2012 vir die publiek heropgestel.[2] Op 19 Oktober 2014 is dit ná 'n kleiner brand weer verwoes.[3]

Verwysings

[wysig | wysig bron]
  1. (en) Royal Museums Greenwich: Cutty Sark. Besoek op 4 Augustus 2017
  2. (en) "Cutty Sark: Queen reopens Greenwich tea clipper". BBC. 25 April 2012. Besoek op 5 Junie 2025.
  3. (en) "Cutty Sark damaged in fire on deck". BBC. 19 Oktober 2014. Besoek op 5 Junie 2025.

Eksterne skakels

[wysig | wysig bron]
Fotogalerye

51°28′58″N 0°0′35″W / 51.48278°N 0.00972°W / 51.48278; -0.00972