Daniël Steyn

in Wikipedia, die vrye ensiklopedie
Jump to navigation Jump to search
Daniël Du P. Steyn
Ds. Daniël Steyn was 'n leraar in die NG Kerk van 1900 tot 1939.
Ds. D. Du P. Steyn

Naam Daniël Du Plessis Steyn
Geboorte 23 Februarie 1873
Swellendam, Kaapkolonie
Sterfte 3 Junie 1959 (86 jaar oud)
Humansdorp, Kaapland
Kerkverband Nederduits Gereformeerd
Gemeente(s) NG gemeente Glen Lynden (twee maal), Salisbury, Britstown, Paterson, Pearston
Jare aktief 1900 tot 1939
Kweekskool Kweekskool, Stellenbosch

Ds. Daniël Du Plessis Steyn (Swellendam, 23 Februarie 1873Humansdorp, 3 Junie 1959) was ’n leraar in die Nederduitse Gereformeerde Kerk van 1900 tot 1939. Sy oom was pres. M.T. Steyn van die Vrystaat.

Eerste gemeentes[wysig | wysig bron]

Ds. Steyn was tussen 1900 en 1908 twee maal leraar van die NG gemeente Glen Lynden. Die hoeksteen van dié ou kerk op Bedford is in 1894 gelê en was in gebruik toe ds. Steyn hier leraar was. Die gemeente het destyds ook 'n dienspunt op die nabygeleë Glen Lynden gehad.

Ds. Steyn is in 1899 gelegitimeer ná hy sy teologiese studie aan die Stellenbosse Kweekskool voltooi het en was daarna ’n kort tydjie hulpleraar in die NG gemeente Oudtshoorn. In 1900 is hy as leraar van die NG gemeente Glen Lynden bevestig, waar hy gearbei het van 1900 tot 1906 en weer van 1907 tot 1908. In die tussentyd was hy leraar van die Salisbury.

Op Britstown[wysig | wysig bron]

Ds. Steyn is tydens die Nagmaalnaweek van 7 tot 9 Junie 1912 in die NG gemeente Britstown bevestig en het die Vrydag op die dorp aangekom, sy eerste kennismaking met Britstown. Onder die sewe besoekende predikante wat die Saterdagaand sy bevestiging bygewoon het, was ds. Pieter van der Merwe, geliefde oudpredikant (toe van Boshof) en ds. Charles Murray Hofmeyr van die NG gemeente Murraysburg, wat die rede gevoer het. Die Sondagoggend by die Nagmaalsdiens het ds. Steyn sy intreepreek gelewer uit Eksodus 3:9 en 10: “Het woord kwam met stille kracht,” volgens ’n plaaslike beriggewer se verslag in die ‘’Kerkbode’’.

In 1918, tydens ds. Steyn se dienstyd, is die Van Zijlsgebou omskep in die kerksaal van die NG gemeente Britstown.

Gedurende sy betreklike kort dienstyd op Britstown het die kerkraad die Van Zijlsgebou in 1913 aangekoop wat in 1918 in ’n kerksaal omskep is. Ook is ’n koshuis vir behoeftige leerlinge, Morgenzon, in 1914 gebou. Dit was die voorloper van tientalle geboue wat jare daarna eers vir die huisvesting van arm leerlinge gestig en soms ook gebou is. Op hierdie gebied was die kerkraad van Britstown ’n baanbreker. In sy tyd is ook die Smartt-besproeiingskema voltooi onder die bestuur van ’n gemeentelid, J.H. Mugglestone. Maar terwyl die Morgenzon-koshuis voltooiing genader het, het ds. Steyn in Julie 1914 ernstig siek geraak aan rumatiekkoors en daar is selfs vir sy lewe gevrees. Die leraar moes na die warmbad op Montagu en later na die kus gaan terwyl die sendingleraar en ’n sendingstudent met die gemeentelike werk gehelp het. Ná ’n afwesigheid van nege maande het ds. Steyn op 4 April 1915 weer die kansel bestyg en ’n gevoelvolle boodskap gebring na aanleiding van Ps. 118:18: “De Heer heeft mij wel hard gekastijd maar Hij heeft mij niet ter dood overgegeven.”

Teen die einde van Mei het die siekte egter hervat en was sy hart in ’n bedenklike toestand. Toe word hy genoodsaak om die tuig neer te lê en op 24 Junie 1915 het twee ringsbroeders in die siekekamer demissie aan hom verleen. So het hy die gemeente onder ’n donker wolk verlaat. As blyk van liefde en waardering het die gemeente ’n beurs van £250 aan hom toegeken. Ongelukkig moes die plaaslike sendeling, eerw. J.M.N. Breedt, in dié tyd met 12 maande siekteverlof weggaan.

Latere loopbaan[wysig | wysig bron]

Die NG gemeente Paterson se teenswoordige kerkgebou is in 1923 ingewy tydens ds. Steyn se dienstyd. Hy was Paterson se vierde leraar.

Ds. Steyn het hierna so goed herstel dat hy van 1916 tot 1928 in die gemeente Paterson kon arbei en van 1928 tot 1939 in Pearston. Op 18 Maart 1939 het hy vir goed afgetree en hom op Somerset-Oos gevestig. Hy is op 3 Junie 1959 op Humansdorp in die ouderdom van 87 jaar oorlede, ruim 45 nadat daar op Britstown vir sy lewe gevrees is. Sy vrou, Anna Sophia gebore Wessels (1887–1959), is oorlede op 10 Januarie 1959, vyf maande voor haar man.

Waardering[wysig | wysig bron]

Ds. I.J. Viljoen, wat hom 16 jaar goed geken het, het van ds. Steyn getuig: “Sy hele lewe is versier deur sy minsaamheid, opregtheid, nederigheid en hoflikheid, wat gepaardgegaan het met ’n diepe godsvrug.” Iemand uit ’n ander kerkverband het van hom getuig: “He was the most angelic person I have ever known. I don’t think I ever remember a face so shining with goodwill.” Volgens ds. A.P. Smit, wat hom ook persoonlik geken het, was hy die toonbeeld van ’n Christen-edelman.

Bronne[wysig | wysig bron]