Dauphin-eiland

in Wikipedia, die vrye ensiklopedie
Jump to navigation Jump to search
Dauphin-eiland
Inheemse naam: Dauphin Island
Die suidoostelike kusgebied van Dauphin-eiland
Die suidoostelike kusgebied van Dauphin-eiland
Geografie
ALMap-doton-DauphinIsland.PNG
Ligging Golf van Meksiko

Oppervlakte 430,1 km2 (waarvan 16,1 km2 land)

Administrasie
Vlag van Verenigde State van Amerika Verenigde State
Deelstaat Alabama

Hoofstad Dauphin Island

Demografie
Bevolking 1 238

Bevolkingsgroepe Meer as 97 persent blankes

Dauphin-eiland (Engels: Dauphin Island) is 'n rifeiland in die Golf van Meksiko, net suid van Bayou La Batre in Mobile County in die Amerikaanse deelstaat Alabama. Die eiland het in sy geskiedenis onder opeenvolgende Franse, Britse en Spaanse bewind gekom voordat dit deel van die Amerikaanse Alabama-gebied en uiteindelik in 1819 deel van die deelstaat Alabama geword het.

Oorspronklik het die eiland as Massacre Island of "Slagtingeiland" bekend gestaan nadat die Franse ontdekkingsreisiger Pierre Le Moyne d'Iberville (1661-1706) hier in 1699 op talle menslike geraamtes afgekom het. Die vermeende slagveld was egter niks meer as 'n Indiaanse grafheuwel wat deur 'n orkaan opgebreek is nie. Later het die eiland ter ere van die seun en erfgenaam van koning Lodewyk XIV van Frankryk sy huidige naam gekry.

Die belangrikste nedersetting op die eiland is Dauphin Island wat in 1988 geïnkorporeer is. Die eiland is danksy sy sandstrande en ryk visgronde 'n gewilde bestemming vir toeriste en amateurvissers. Weens die groot swerms trekvoëls wat hier vergader, is Dauphin-eiland, wat amptelik tot natuurbewaringsgebied verklaar is, daarnaas 'n gewilde trekpleister vir voëlliefhebbers. Sedert 1982 verbind 'n padbrug, Gordon Persons Bridge, die eiland met die vasteland.

Geografie[wysig | wysig bron]

Dauphin-eiland is sowat drie myl suid van die Baai van Mobile geleë. Die eiland is sowat 14 myl lank met 'n maksimale wydte van 1 ¾ myl. Slegs die oostelike ses myl is bewoon, terwyl die westelike gedeelte met 'n lengte van agt myl in privaatbesit is en nie vir toerisme of ander doeleindes ontsluit word nie. Die eiland het sowat 1 300 permanente bewoners, maar word gedurende vakansies deur duisende toeriste besoek.

Nadat die trekbrug, wat die eiland oorspronklik met die vasteland verbind het, in 1979 deur die orkaan Frederic vernietig is, is 'n nuwe padbrug gebou wat in Julie 1982 ingewy is. 'n Motorveerboot doen gereeld in die ooste van die eiland aan.

Nadat groot dele van die eiland in 1979 deur die orkaan Frederic verwoes is, het ook orkaan Katrina in 2005 groot skade berokken en die onbewoonde westelike deel van die eiland afgesny. As gevolg van die Deepwater Horizon-olieramp het in 2010 teerbolle op die eiland se strande uitgespoel. In 2012 het orkaan Isaac die eiland getref. Die deelstaat Alabama het 'n deel van die skadevergoeding, wat van die Britse oliereus BP vir die Deepwater Horizon-ramp ontvang is, in 2014 gebruik om die skade, wat deur Katrina aangerig is, te herstel.