Die Nagwag

in Wikipedia, die vrye ensiklopedie
Die Nagwag

Ander titel De Nachtwacht
Kunstenaar Rembrandt van Rijn
Jaar 1642
Soort Olieverfskildery
Grootte 363 × 437 cm
Museum Rijksmuseum, Amsterdam

Die Nagwag is die bekendste skildery van Rembrandt van Rijn. Hy het dit tussen 1639 en 1642 geskilder. Die amptelike naam daarvan is De compagnie van kapitein Frans Banning Cocq en luitenant Willem van Ruytenburgh maakt zich gereed om uit te marcheren.

Die skildery het waarskynlik omstreeks 1676 die naam Die Nagwag gekry. Dit word permanent uitgestal in die Rijksmuseum in Amsterdam, Nederland, en is die bekendste skildery in die versameling en een van die beroemdste skilderye ter wêreld.

Sleutelelemente[wysig | wysig bron]

Die skildery is veral bekend vir drie eienskappe: die enorme grootte (363 x 437 cm), die doeltreffende gebruik van lig en skadu, en die persepsie van beweging in wat andersins ’n statiese militêre skildery sou gewees het.

Die skildery is in 1642 voltooi tydens die hoogtepunt van die Nederlandse Goue Era. Dit beeld ’n groep van 18 offisiere uit van die kompanie van kaptein Frans Banninck Cocq (in swart geklee) en sy luitenant, Willem van Ruytenburgh (in geel geklee). Met die doeltreffende gebruik van lig en skadu het Rembrandt die oog gelei na die drie belangrikste figure in die skare: die twee bogenoemde offisiere in die middel en die meisie net links van die middel van die skildery (ook in geel geklee, en wat verskeie simboliese eienskappe het). Agter hulle dra Jan Visscher Cornelissen die kompanie se vlag.

Die res van die skildery was taamlik donker, en weens die verkleuring van die vernis het dit later nog donkerder gelyk. Daarom is aangeneem dat dit ’n nagtoneel was, en dit is waar die skildery sy naam Die Nagwag gekry het.

Eksterne skakels[wysig | wysig bron]