Dmitri Iwanowitsj van Rusland

in Wikipedia, die vrye ensiklopedie
Jump to navigation Jump to search
Dmitri Iwanowitsj
Tsarjewitsj Dmitri, deur Michail Nesterof.)
Tsarjewitsj Dmitri, deur Michail Nesterof.)
Gebore 19 Oktober 1582
Oorlede 15 Mei 1591
Kerk Heilige in die Oosters-Ortodokse Kerk
Feesdae 19 Oktober, 15 Mei en 3 Junie

Tsarjewitsj Dmitri Iwanowitsj, ook bekend as Dmitri van Oeglitsj (Russies: Дмитрий Иванович, Дмитрий Угличский; 19 Oktober 1582 – 15 Mei 1591), was die jongste seun van tsaar Iwan die Verskriklike.

Lewe[wysig | wysig bron]

Ná die dood van Iwan die Verskriklike het Dmitri se ouer broer, Fjodor I, die Russiese troon bestyg. Die ware heerser was egter Fjodor se swaer, Boris Godoenof, wat ook ’n aanspraak op die troon gehad het. In 1584 het Godoenof Dmitri en sy ma na die stad Oeglitsj verban. Op 15 Mei 1591 is Dmitri onder geheime omstandighede dood aangetref met ’n steekwond.

Ongeluk of moord?[wysig | wysig bron]

Die huis waarnaby Dmitri dood aangetref is.

Russiese historici het twee teorieë oor wat met Dmitri gebeur het. Die eerste is dat Godoenof hom laat vermoor het en sy moordenaar dit soos ’n ongeluk laat lyk het. Die mense wat teen dié teorie is, voer aan dat Dmitri nie ’n aanspraak op die troon gehad het nie omdat hy uit Iwan se vyfde (of sewende) huwelik gebore is en die Russies-Ortodokse Kerk net drie huwelike toelaat. Hy is dus deur die kerk as buite-egtelik beskou.

Die tweede teorie is dat Dmitri homself per ongeluk in die nek gesteek het toe hy met ’n mes gespeel en ’n epileptiese toeval gekry het. Die teenstanders van dié teorie beweer dat ’n mens se handpalms tydens ’n epileptiese toeval wyd oop is en dat dié moontlikheid onwaarskynlik is. In die amptelike nadoodse ondersoek is destyds bevind dat Dmitri ’n gooispeletjie met die mes gespeel en dit aan die lem vasgehou het. Dan is dit wel moontlik dat hy homself kon gesteek het.

Nasleep[wysig | wysig bron]

In ’n gewelddadige opstand ná sy dood wat deur sy ma, Maria Nagaja, aangehits is, is verskeie mense vermoor. Nadat bevind is dat hy homself per ongeluk gesteek het, is Maria gedwing om ’n non te word en na ’n afgeleë klooster verban.

Nog ’n nasleep van sy dood was dat verskeie swendelaars in die gewelddadige Tyd van Beroeringe voorgegee het hulle is Dmitri, wat glo die voorval oorleef het omdat die verkeerde seun vermoor is. Twee van hulle het selfs vir kort rukke op die Russiese troon gesit.

Dmitri is later deur die Russies Ortodokse Kerk tot heilige verklaar. Sy feesdae is 19 Oktober, 15 Mei en 3 Junie. ’n Klein kerk is in 1690 gebou op die plek in Oeglitsj waar hy dood aangetref is.

Sien ook[wysig | wysig bron]

Eksterne skakels[wysig | wysig bron]