Vals Dmitri II van Rusland
Vals Dmitri II (Russies: Лжедимитрий II), ook genoem die Rebel van Tusjino, was die tweede swendelaar wat in die Tyd van Beroeringe voorgegee het hy is Dmitri Iwanowitsj, jongste seun van Iwan die Verskriklike wat in 1591 glo ’n sluipmoordaanval oorleef het. Daar word algemeen aanvaar dat die ware Dmitri in Oeglitsj vermoor is.
Die tweede Vals Dmitri het omstreeks 1607 in Starodoeb op die toneel verskyn. Hy was na bewering óf ’n priester se seun óf ’n bekeerde Jood en was goed opgevoed vir daardie tyd. Hy het Russies en Pools gepraat en was ’n soort kenner van liturgiese sake. Hy gee eers voor hy is die Moskouse bojaar Nagoi; maar erken onder marteling hy is tsarewitsj Dmitri. Hy word geglo en duisende Kosakke, Pole en inwoners van Moskou sluit by hom aan.
In die loop van die jaar "herenig" Jerzy Mniszech, vader van Marina Mniszech, weduwee van die eerste Vals Dmitri, hom met Marina. Sy erken die tweede Dmitri wonder bo wonder as haar oorlede man, Vals Dmitri I. Sy trou in die geheim met dié swendelaar, wat glad nie soos haar eerste man lyk nie. Daardeur verwerf hy die steun van die eerste Vals Dmitri se ondersteuners, wat vir hom geld en 7 500 soldate gee.
Gou neem hy Karatsjef, Brijansk en ander dorpe in en versterk Poolse soldate sy leër. In die lente van 1608 trek hy teen Moskou op. Met beloftes dat beslag gelê sal word op die landgoede van die bojare, werf hy die steun van talle gewone mense. Die dorpie Tusjino naby Moskou word in ’n leërkamp vir Dmitri omskep. Daar is aanvanklik 7 000 Poolse soldate, 10 000 Kosakke en 10 000 ander soldate, en dit groei gou aan tot meer as 100 000 man. Hy stel Fjodor Romanof aan as patriarg en wen die onderdanigheid van die stede Jaroslawl, Kostroma, Wologda, Kasjin en verskeie ander.
Die aankoms van koning Sigismund III Wasa by Smolensk veroorsaak dat talle Poolse ondersteuners hom verlaat en oorloop na die leërs van die Poolse koning. Intussen trek ’n sterk Russies-Sweedse leër onder Michail Skopin-Sjoeiski en Jacob de la Gardie na Tusjino op. Dit dwing hom om na Kostroma te vlug, vermom as ’n boer, en daar sluit Marina by hom aan. Hy loods nog ’n onsuksesvolle aanval op Moskou en herwin ’n houvas oor Suidoos-Rusland met die steun van die Don-kosakke. Hy word egter op 11 Desember 1610 vermoor terwyl hy halfdronk is.