Fokofpolisiekar

in Wikipedia, die vrye ensiklopedie
Jump to navigation Jump to search
Fokofpolisiekar
Fokofband.jpg
Fokofpolisiekar in Amsterdam, Nederland, Mei 2011
Agtergrondinligting
Ook bekend asPolisiekar
Die Bende
FPK
OorsprongBellville (Suid-Afrika)
GenresRock, punk
Jare aktief2003 — 2007
2009 — hede
AssosiasiesaKing, Die Heuwels Fantasties, Van Coke Kartel, Francois van Coke
Webwerffokofpolisiekar.co.za
LedeFrançois van Coke
Hunter Kennedy
Jaco Snakehead Venter
Wynand Myburgh
Johnny de Ridder

Fokofpolisiekar (ook bekend as Die Bende, Polisiekar of FPK) is 'n Afrikaanse musiekgroep van Bellville naby Kaapstad, Suid-Afrika. Die groep het in April 2003 as 'n grap ontstaan met die doel om die konserwatiewe Afrikaanse gemeenskap te skok. Die groepsbesetting is François “van Coke” Badenhorst met voorsang, Hunter Kennedy met sang en ritmekitaar, Jaco "Snakehead" Venter op die tromme, Wynand Myburgh op baskitaar en Johnny de Ridder op hoofkitaar.

In 2003 het hulle, sonder om al ooit te getoer het, hul eerste EP, As jy met vuur speel sal jy brand, uitgegee. Die eerste enkelsnit, Hemel op die Platteland, het geskiedenis gemaak toe dit die eerste Afrikaanstalige snit geword het om op die radiostasie 5FM se amptelike speellys gelys te word. As jy met vuur speel sal jy brand is deur Lugsteuring (2004), hul eerste vollengtealbum, opgevolg. Teen hierdie tyd het die Afrikaanse jeug reeds aanklank by die boodskap wat die groep uitdra, gevind. 2005 se Monoloog in Stereo EP was as bewys hiervan 'n reuse sukses.

In 2006 het Fokofpolisiekar beide Brand Suid-Afrika, 'n enkelspeler, en Swanesang, hul tweede vollengtealbum, uitgereik. Beide is goed ontvang en het baie speeltyd op DStv se hoofsaaklik Afrikaanse musiekkanaal MK gekry.

In 2007 het die groep 'n kort breuk geneem en in hierdie tyd is drie ander groepe gebore: aKing (met Jaco S. Venter as die tromspeler), Die Heuwels Fantasties (met kitaarspeler Hunter Kennedy op baskitaar en Johnny de Ridder op produksie) en Van Coke Kartel (met Francois van Coke op kitaar en sang en Wynand Myburgh op baskitaar).

In Augustus 2007 het Fokofpolisiekar weer saam begin optree as 'n groep.

Omstredenheid[wysig | wysig bron]

Die groep was sedert hul ontstaan in omstredenheid gedompel. Baie radiostasies was aanvanklik onwillig om hul musiek te speel vanweë die vloekwoord in die groep se naam, daarom is hulle deur baie net "Polisiekar" gedoop.

Die groep het die hoogtepunt van hul kontroversie bereik in April 2006, toe Wynand Myburgh die woorde "fok god" op die beursie van die Afrikaanse sanger, Bobby van Jaarsveld geskryf het. Dit het gebeur tydens 'n gesprek oor geloof in 'n nagklub. Godsdiensleiers het na afloop hiervan die media begin gebruik om die groep te teiken en hulle misnoeë uit te spreek oor die groep se sentiment oor geloof.

Polisiekar is amper uit die Klein Karoo Nasionale Kunstefees geskop deur die land se kerkleiers wat gedreig het om hul sale te onttrek, sou die groep daar optree.

Invloed[wysig | wysig bron]

Sonder die intensie om 'n verskil te maak in Afrikaans, het hierdie groep 'n ommeswaai veroorsaak in jongmense se denkwyses. Jongmense kon begin identifiseer met hierdie eerlikheid en kon meer gemaklik met hul eie emosies en opstand raak. Apartheid het in die vroeë 2000's steeds bo almal se koppe gehang en wit Afrikaanse jongmense het skaam gevoel oor wie en wat hulle is. Met die invloed van die lirieke en die gemaklikheid van hierdie musiekgroep se doen en late, het die donker wolk stadig maar seker bo almal se koppe verdwyn en het trots en die viering van jou eie identiteit kom plek maak.

Die lirieke is poëties, intelligent en eerlik en dit strek oor ras, geslag, klas en ouderdom.

Albums[wysig | wysig bron]

  • As jy met vuur speel sal jy brand (EP, 2003)
  • Lugsteuring (2004)
  • Monoloog in Stereo (EP, 2005)
  • Brand Suid-Afrika (enkelspeler, 2006)
  • Swanesang (2006)
  • Antibiotika (EP, 2008)
  • Selfmedikasie (2017)
  • Droom Hoog (EP, 2018)

As jy met vuur speel sal jy brand (2003)[wysig | wysig bron]

As Jy Met Vuur Speel Sal Jy Brand is Fokofpolisiekar se eerste vrystelling. Dit is 'n 7-snit EP wat in 2003 deur Rhythm Records in Suid-Afrika vrygestel is. Snit 7, "Fokofpolisiekar", het 'n versteekte snit wat op 5:37 begin speel, en handel oor die agteruit speel van snitte.

Lugsteuring (2004)[wysig | wysig bron]

Lugsteuring is Fokofpolisiekar se eerste vollengtealbum. Daar is twaalf snitte daarop, Dit was vrygestel in 2004 deur Rhythm Records

Monoloog in Stereo (2005)[wysig | wysig bron]

Monoloog in Stereo is Fokofpolisiekar se derde vrystelling en hul tweede EP. Dié album is in Junie 2005 vrygestel.

Brand Suid-Afrika (2006)[wysig | wysig bron]

Brand Suid-Afrika is 'n 4-snit-EP. Dit is deur Rhythm Records in 2006 vrygestel en sluit 'n musiekvideo van "Hemel op die Platteland (akoesties)" in. Die CD speel omtrent 14 minute lank sonder die musiek video.

Swanesang (2006)[wysig | wysig bron]

Swanesang is die groep se tweede vollengtealbum. Dit is in 2006 deur Rhythm Records vrygestel en is 45:08 minute lank. Die album is nie so swaar as vorige albums nie en bevat meer melodieë en alternatiewe klanke. Dit sluit die baan "Brand Suid-Afrika" in, wat vroeër op Brand Suid-Afrika vrygestel is. Hierdie album het ook 'n SAMA-toekenning gewen onder die kategorie: Beste Afrikaanse rock-album.

Antibiotika (2008)[wysig | wysig bron]

Antibiotika is 'n dubbelalbum wat in 2008 vrygestel is. Dit bevat vier snitte en agt musiekvideo's van vorige uitgawes met 'n video van die opkomende Fokofpolisiekar-dokumentêr.

Selfmedikasie (2017)[wysig | wysig bron]

Die groep se eerste vollengte album is 11 jaar later uitgereik op 3 Oktober, 2017. Om die album te kon vervaardig het die groep gebruik gemaak van skarefinansiering via Thundafund en het meer as R1 000 000 ingesamel. Die klaviergedrewe lied, Komma, het meer as 2 000 000 kyke op YouTube gekry. Droom Hoog was die eerste lied van hierdie album wat ook sy eie musiekvideo gekry het.

Parkiebank se musiekvideo het die lig gesien in Herfs van 2017. Sean Metelerkamp, wat ook die maak van Anitbiotika se musiekvideo behartig het, het Parkiebank se video ook in 'n visuele kunswerk omskep. Die eerste konvensionele weergawe is gedoen en gebasseer daarop is daar onderhoude gevoer met aanhangers in Durbanville, Stellenbosch en Bloemfontein. Almal wat deelgeneem het se opinies op sosiale media vrygestel.

Hunter Kennedy, liriekskrywer en kitaarspeler se mening oor die lied:

“Uiteindelik dink ek die punt van die lied is om mense te kry om net weer hulleself belangrike vrae af te vra rondom identiteit en die rol wat hul hulself sien speel in ons breë samelewing om sodoende mense te kry om ingeligte besluite te kan neem.”

DROOM HOOG (2018)[wysig | wysig bron]

Hierdie EP is twee weke voor die aanlyn premiere gratis beskikbaar gestel aan almal wat Fokofpolisiekar se skarefinansieringsveldtog Selfmedikasie in 2017 ondersteun het. DROOM HOOG is die eerste enkelsnit en musiekvideo vanaf die EP met dieselfde naam. Tenspyte hiervan het dit egter steeds goed gevaar op iTunes SA se Top 10. Die musiekvideo is 'n kombinasie van die lirieke en beelde van die foto's wat Liam Lynch en Jaco S. Venter geneem het vir die fotografie-uitstalling wat ook DROOM HOOG heet.

Die baskitaarspeler, Wynand Myburgh, se mening oor die album:

“Voor Selfmedikasie het ons as Fokof vir ‘n baie lang tyd nie saamgeskryf nie. Om te begin met nuwe musiek was ‘n reuse uitdaging, maar toe ons eers in ons ou/nuwe vloei kom, het die musiek ook maklik gekom. Ek dink die kreatiewe proses, the uitstekende terugvoering oor die nuwe musiek en die mal skarefinansieringsveldtog het ons opgewonde gemaak om nog musiek te maak.  Ons het Sunset Studios toe gegaan in Augustus en DROOM HOOG gaan opneem. Dit het alles baie vinnig gebeur en ons het aangehou om mekaar en die proses te vertrou.  Ons is trots op die nuwe liedjies en ek hoop dat mense dit net soveel soos ons sal geniet.”

DROOM HOOG Fotografie-uitstalling[wysig | wysig bron]

Die uitstalling is 'n reeks van 22 foto's wat geneem is deur Liam Lynch en Fokofpolisiekar se tromspeler, Jaco S. Venter. Hulle het die groep se opname van die DROOM HOOG kortspeler, hulle kort toer na Europa, lewe op die pad en by die huis gedokumenteer. Die eerste uitstalling was by Redemption Burgers and Bar in Langstraat, Kaapstad gehou en het 'n tweede buiging in Pretoria gemaak by die Fokof Bar in Lynnwood.


Fokof Lager[wysig | wysig bron]

Die groep by die bekendstelling van hul eie bier

Die groep hul eie, unieke bier geformuleer, genaamd: Fokof Lager. Die bier was bekendgestel in vorm van geskenkbokse, gepak met die Selfmedikasie CD en twee sespakke van hul premium lager in 2017.

Sedertien is dit landswyd beskikbaar by geselekteerde drankwinkels en restaurante. In 2019 het die internasionaal bekende Mortal Kombat TM 11, saamgespan om 'n beperkte uitgawe van Fokof Lager uit te gee in blikkies.

In Februarie 2019, het Fokofpolisiekar ook die deure van hul eie restaurant, Fokof Bar, oopgemaak in Lynnwood, Pretoria


Studies van Fokofpolisiekar[wysig | wysig bron]

Artikels[wysig | wysig bron]

  • Kahn, R. 2011. ‘Oop vir misinterpretasie’: South African journalism's take-up and representation of the music of Fokofpolisiekar. Ecquid Novi: African Journalism Studies, 32(3), pp.19-33.
  • Senekal, B.A. 2013. Fokofpolisiekar en die musiek van vervreemding, Tydskrif vir Nederlands en Afrikaans, 20(1), 87-101.

Verhandelings en proefskrifte[wysig | wysig bron]

  • Klopper, A.E. 2009. Die opkoms van Afrikaanse rock en die literêre status van lirieke, met spesifieke verwysing na Fokofpolisiekar (Universiteit van Stellenbosch).
  • Loubser, L. 2015. Afrikaner identity in the born-free generation: Voortrekkers, farmers and Fokofpolisiekar.

Boeke[wysig | wysig bron]

  • Grundlingh, A.M. en Huigen, S. (reds.). 2008. Van volksmoeder tot Fokofpolisiekar: Kritiese opstelle oor Afrikaanse herinneringsplekke. African Sun Media.
  • Klopper, A. 2011. Biografie van'n bende: die storie van Fokofpolisiekar. Protea Boekhuis.

Sien ook[wysig | wysig bron]

Eksterne skakels[wysig | wysig bron]

Verdere leesstof[wysig | wysig bron]

Bron[wysig | wysig bron]

  • Mediaverklarings van die groep se bestuur